کراچی ءَ وائس فار بلوچ مسنگ پرسنز ءِ بنجل ءِ نبشتگیں تاک ءُ اکس دور کنگ بوتگ انت

پیش ءَ مردم آوار جنگ ءُ بیگواہ کنگ بوتگ انت نوں آھانی اکس آوار جنگ بوگ ءَ انت – ماما قدیر بلوچ

دی بلوچستان پوسٹ

وائس فار بلوچ مسنگ پرسنز ءِ کمک سرکماش ماما قدیر بلوچ ءَ مروچی سھب ءَ وتی شنگ کرتگیں تامری درشان ءِ تہ ءَ گوشتگ کہ گوستگیں شپ ءَ کراچی پریس کلب ءِ دیم ءَ برجاھیں مئے بنجل ءَ ایریں بیگواھیں مردمانی نبشتگیں تاک ءُ اکس ناشناسیں مردماں درگ ءُ یک یک کتگ انت اش ءُ گوں وت اش برتگ انت ئے –

ماما قدیر بلوچ ءَ گوشتگ کہ یک ماھے بیت کہ مئے بنجل کراچی پریس کلب ءِ دیم ءَ انت ءُ گوستگیں روچ ءَ ما بیگواھیں انسانی ھکانی باسک راشد حسین ءِ زورانسری آوار جنی بیگواھی ءُ پد ءَ آئی باگی بوگی ءِ بگیری ءَ یک پریس کانفرنس ءِ کُتگ کہ گوستگیں شپ ءَ اے وئیل دیم ءَ اتکگ اَنت –

آئی ءَ گوشتگ اشی ءَ پیش شال ءَ ھم مئے بنجل سوچگ بوتگ ءُ مارا بیھار دیگ بوتگ اَنت نوں کراچی ءَ ھم مئے بیگواھیں مردمانی اکساں آوار جنگ ءَ انت –

آئی ءَ گوششتگ کہ پیش ءَ مردم آوار جنگ ءُ بیگواہ کنگ بوتگ انت نوں آھانی اکس آوار جنگ بوگ ءَ انت –

ماما قدیر بلوچ ءَ گوشتگ اے کارانی کنگے زمّہ وار سرکار ءُ ادارہ اَنت، منی جان ھم ھترہ ءِ توک ءَ انت ءُ اے یک ٹریلرے بوتگ، من ءَ ترسینگ بوگ ءَ انت – آئی ءَ چہ سندھ ءِ سرکار ءَ لوٹ کتگ کہ آ پھازگ بہ بیت –

آئی ءَ گوشتگ کہ ما یکرندے پد ءَ لوٹ کن ایں کہ بیگواھیں مردم دیم ءَ آرگ بہ بنت اگاں آھانی تہ ءَ کسے کُتکار انت گڑا آمیدگس ءَ آرگ بہ بنت ءُ سزا دیگ بہ بنت –

زانگ بہ بیت اے دراج کشیں شدکشیں زھرشانی ءِ بنجل بلوچستان ءِ تہ ءَ بیگواھیں مردمانی یل کنائینگے ھاتر ءَ کنگ بوتگ – کہ آئی ءَ یازدہ سال سرجم انت ءُ زمستان ءَ بنجل چہ شال ءَ کراچی ءَ آرگ بیت –

اے دراج کشیں شدکشیں زھرشانی بنجل ءَ چہ بلوچستان ءَ آوار جنگ ءُ بیگواہ بوتگیں مردمانی کھول کائنت ءُ بنجل ءَ وتی زھرشانی ءَ نبشتہ کنائین انت –

وائس فار بلوچ مسنگ پرسنز ءِ زھرشانی بنجل مروچی ھم کراچی پریس کلب ءِ دیم ءَ برجاہ بوتگ – مروچی زھرشانی بنجل ءَ چار ھزار ءُ دوسد روچ سرجم بوتگ –

جتا جتائیں پگرے منوگراں اتکگ ءُ بنجل ءَ تر ءُ تاب کرتگ ءُ بیگواھیں مردمانی کھولانی گون ءَ ھمدردی درشان اتگ –