سید ھاشمی ریفرنس کتابجاہ ءِ نوکیں کابینہ ءِ نیمگ ءَ دیوانے برجم دارگ بیتگ

دیوان ءَ دمگانی نوکیں جھگیر نامینگ بیتگ اَنت آیانی تہ ءَ شبیر رخشانی، عاصم زھیر، ڈاکٹر سخی فضل، ناز بار کزئی،نواز فتح ءُ نثار بادینی گچینگ کنگ بیتگ اَنت –

دی بلوچستان پوسٹ

دہ جنوری دو ھزار ءُ بیست ءُ یک ءَ سید ھاشمی ریفرنس کتابجاہ ءَ نوکیں کابینہ ءِ اولی دیوان کنگ بیتگ ءُ دیوان ءَ سالینہ بجاری ءِ سر ءَ گپ ءُ تران بیتگ –

نیاد ءَ گوشگ بیتگ کہ ھما باسک کہ کتابجاہ ءَ بندوک بیتگ اَنت آ آیاں بجاری اگاں سر نہ کرت اَنت گڑا آ چہ کتابجاہ ءِ باسکی ءَ مھتل کنگ بنت –

نیاد ءَ گوشگ بیتگ کہ ھما باسک کہ آیاں بجاری نہ داتگ یا کہ تنی وھدی باسک نہ اَنت گڑا آ کتاب جاہ ءَ بس تر ءُ تاب ءَ چار اِت کن اَنت ءُ وانگ ءُ پَٹ ءُ پول ءَ آ اجازت دیگ نہ بنت –

کابینہ ءِ نیاد ءَ کتابجاہ ءِ دمگانی نوکیں جھگیر گچین کرتگ کہ آیانی تہ ءَ شبیر رخشانی: آواران، جاھو، مشکے ءُ کش ءُ گوری ھندانی نامینگ بیتگ، عاصم زھیر ءُ ڈاکٹر سخی فضل شال ءِ جھگیر نامینگ بیتگ اَنت، ناز بارکزئی ھب بلوچستان، نواز فتح کراچی اردو بازار ءُ نثار بادینی نوشکی ءِ جھگیر نامینگ بیتگ اَنت –

نیاد ءَ گوشگ بیتگ کہ بیست ءُ یک فروری ءَ ماتی زبانانی میان اُستمانی روچ ءِ درگت ءَ صدیق میتگ ءَ ملیر ءَ یک دیوانے برجم دارگ بیگ ءَ اِنت –

نیاد ءَ گوشگ بیتگ کہ دیوان چار بھرانی تہ ءَ اِنت کہ اولی بھر “زبان ءِ ارزشت ءِ سر ءَ چمشانک، دومی بھر ءَ غلام رسول کلمتی ءِ چاپ ءُ شنگ بیتگیں کتاب “گالگنج ” ءِ دیمدرائی بیت ءُ زانتکار اے درگت ءُ وتی ھیال ءُ لیکھاں درشان کن اَنت، سیمی بھر تلو ءِ کسمانکے پیش کنگ بیت ءُ دیوان ءِ گڈی بھر ساز ءُ زیملی بیت –

زانگ بہ بیت سید ھاشمی ریفرنس کتابجاہ ءِ اے کابینہ سَے جنوری ءَ برجم دارگ بیتگ اَت کہ کابینہ ءِ سروک ڈاکٹر رمضان نامینگ بیتگ اَت –