کراچی ءَ بیگواھیں مردمانی ھاتر ءَ زھرشانی برجاہ

ھما مردم کہ پاکستانی پتر کارانی تہ ءَ انت ءُ ھکے گپ ءَ کنگ ءَ اَنت آ وت ءَ وت دوکہ دیگ ءَ اَنت یا زیردستانی گون ءَ مشکرا کنگ ءَ انت – اے مردم ھما پتر ءَ مھکم کنگ ءَ انت کہ مئے ایردستی ءِ سوب انت – ماما قدیر بلوچ

دی بلوچستان پوسٹ

سندھ ءِ مزن شھر کراچی ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ یک سد ءُ نود روچ سرجم بوتگ-

جئے سندھ متحدہ مھاز ءِ گوستگیں جنرل سیکٹری ءَ ھوار وائس فار مسنگ پرسنز آف سندھ ءِ سسی لوھار ءُ سول سوسائٹی ءِ مردماں اتکگ ءُ بیگواھیں مردمانی کھولانی گون ءَ دلپدری درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ پاکستان ءِ چیریں ادارھانی زلم ءُ زوراکی بلوچ راج ءِ سر ءَ یکشل ءَ برجاہ ءَ انت – پُرایمنیں جد ءُ جھد ءِ لگتمال کنگ ءِ جھد کنگ بوگ ءِ انت ءُ بلوچستان ءَ میان اُستمانی رھبندانی لگتمال بوگ ءَ انت – بلوچستان ءَ ھزاراں مردمانی آوار جنی ءُ آھانی کوش ءَ پد ھم اے سلسلگ برجاہ ءَ انت –

آئی ءِ گوشگ ات کہ میام اُستمانی ھکانی گل پہ زوری اے وئیلانی رپورٹ ءَ کنت – ھزارانی کچ ءَ مھلوک در پہ در کنگ ءَ لاچار کنگ بوتگ ءُ دمگ ھالیگ کنگ بوتگ اَنت وھدیکہ در پہ در زند گوازینوکیں مردم ھم دری ھمساھگیں ڈیھانی تہ ءَ ایجنٹسانی کمک ءَ نشانگ کنگ بوگ ءَ انت –

ماما قدیر بلوچ ءَ گوشتگ کہ زورگریں رھبند ءُ کانود آئی ءِ رکینگ ءِ ھاتر ءَ جوڑ کنگ بوتگ انت بلے مروچی ھما کانود ھم یک کر ءَ ایر کرتگ ءُ بلوچاں آھانی ھک دیگ نہ بوگ اَنت – ھما مردم کہ پاکستانی پتر ورک تہ ءَ انت ءُ ھکے گپ ءَ کنگ ءَ انت آ وت ءَ وت دوکہ دیگ انت یا مزلومانی گون ءَ مشکر کنگ انت – اے مردم ھما پتر ءَ مھکم کنگ انت کہ مئے ایردستی ءِ سوب انت –