تربت ءَ منندی باڑہ داریں کوٹی ءَ دزبمب اُرش ءِ زمّہ واری بی ایل اے ءَ منّ اِتگ

دی بلوچستان پوسٹ

تربت بازار ءَ باڑہ داریں کوٹی ءِ تہ ءَ بوتگیں دزبمب اُرش ءِ زمّہ واری ءَ منّیں، اُرش چیریں ادارھانی کارمندانی سر ءَ کنگ بوتگ – جئیند بلوچ

سربیتگیں ھالانی رِد ءَ بلوچستان ءِ دمگ کیچ ءِ بنجاھی شھر تربت ءَ ناشناسیں مردماں منندی باڑہ داریں کوٹی ءِ سر ءَ دز بمب اُرشے کُتگ –

اُرش گوستگیں شپ ءَ تربت بازار ءَ شاہ پور ھوٹل ءِ باڑہ داریں کوٹی ءِ تہ ءَ بوتگ، کہ اود ءَ دری مردم نندوک بوتگ انت – تراک ءَ کوٹی ءَ تاوان رس اتگ بلے ھچ وڑیں جانی تاوان ءِ ھال نیست – ناشناسیں مردم درآیگ ءُ رؤگ ءَ سوبین بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں گوستگیں شپ ءَ کیچ ءِ بنجاھی شھر تربت ءَ زورگپتیں پاکستانی پوج ءِ چیریں ادارھانی کارمند دزبمب اُرش ءِ نشانگ کرتگ انت –

جارکش ءَ گوشتگ کہ دژمن ءِ چیریں ادارھانی ھاتر ءَ کارکنوکیں اے کارندہ تربت ءِ بنجاھی بازار ءَ شاپور ھوٹل ءِ باڑہ داریں کوٹیاں نندوک بوتگ انت – اے اُرش ءِ آسر ءَ پوج ءِ کارمنداں جانی تاوان ءِ دیمپانی بوتگ –

جارکش جئیند بلوچ ءَ وتی درشان ءِ تہ ءَ گوشتگ کہ بی ایل اے ءَ دہ جنوری ءَ وتی شنگ کرتگیں درشان ءِ تہ ءَ اے گپ پدر کتگ کہ درسیں ریاستی کارمند مئے چم ءِ تہ ءَ انت، راجی زرمبشت ءُ بلوچ راج ءِ بگیری ءَ کارکنوکیں دژمن ءِ کمکار بیمناکیں سز ءَ سرکنگ بنت –

جارکش ءَ گوشتگ کہ اے اُرش ھمے درچانی بھر اِنت – بلوچ لبریشن آرمی ھما درسیں ریاستی کارمنداں یک پہ یک ءَ نشانگ جوڑ کنت کہ وتی رنگے مٹینتگ ءُ بلوچ راج ءِ میان ءَ انت ءُ دژمن ءِ ھاتر ءَ دلاری ءُ راجی زرمبشت ءِ بگیری ءَ کار کنگ ءَ انت –