لچہ: پاگ
لچہ کار: عمرمراد
دی بلوچستان پوسٹ
ما چُنیں اھدے زندگی گوستیں
نئے ملارے ءُ موسُمے مَستیں
نئے گِدانے ءُ سَموئے اَستیں
نئے بَزّیں دیوان ءِ پَچّ اِنت پَتّر
نئیکہ تالان اَنت گال شؤلا ءِ
نئیکہ سرسبزاں تَلّ مؤلا ءِ
سِمُکیں اھد ءِ کبر ءِ دلمانگ
پہ دُوا زندگ نوں نہ بنت نھتا
ھؤ جنازہ نوں کؤرگ اَنت پمّا
بَچّاں سالونکیں مات نازین اَنت
ذرد گریوَنت ءُ لُنٹ بچکنداَنت
سَد ھزار نالت بات ترا کُوڈھ
اؤہ ءِ چَمکُٹّیں بیھ ءِ بنی آدم
سرجمیں اوھے ھم نہ کرز ءِ تو
کئے ترا انسان ءِ شَرپّ داتگ
کئے ترا ھَکّانی پانگپان گُشتگ
کئے ترا میّاں اُستُمان گُشتگ
کَرّ ءُ کوریں گُنگُدامے ءِ تو
اچ لَدی ھُوکاں پِر ترا بوگے
بیا منی بولانیں باتن ءَ سَر کَشّ
بیا منی لبنانیں دیدگاں بوان تو
گوشبدار آوار پُشپدیں درداں
بِشکُن ماتانی گرمیں گینسارتاں
بو چِن اَنت گوات ءِ دامُن ءَ ھردم
بلکیں زندان ءِ دمکاں پیداک اِنت
بلکیں گاریں بَچّ ءِ بوہ ءَ کنت
بلکیں ھلک ءِ منی پُراں دنزے
وارت ءُ رِیت تہنا نؤبت ءِ ھاکم
مسل ءِ گامیش ءُ کائیگر ءِ پئیم ءَ
بُرتیں ماں کیلکؤریں کیلگے بَستیں
روچ ءُ شپ چارینتیں کَڈب ھُشکیں
یا جَوئی بے دانیں پُگ اِت بوارتیں
جُگ کُتیں آھُریں ڈگار شومتیں
تو کُجا ءُ اے بادشہی اُگدہ
گردن ات رُستگ چو پِیل ءِ سانڈا ءِ
وارتگ اِت ھون چو گوج ءَ پُونش ءِ تو
ڈیھ ءِ واھُند منی ھما بَچ اَنت
مند تاں بولان ءَ پیادگ ءَ گَرداَنت
وردِن اِش ھُرماگ ءُ پُرانیگ اَنت
گام پہ گام راج ءِ سَکّی آں گون اَنت
ھپت دَھک ءَ تاں داشتگ اش جنگے
گوں کلاشان ءُ گونژیں ھتیاراں
دُژمن اش گوْھتگ کُرتہ تاچینتگ
تئ کُمَکارانت تیوگیں دُنیا
داھِش ءُ جئیشاں بئے مکن انگت
وتکُشیں تراکے ءَ کُش اَنت سئے سد
بے گُناھ لاچار ءُ ھزار بزّگ
،، جَلّ ھما ماتانی دل ءَ بات اَنت،،
بَچ اِش ناپاک ءِ دست ءَ بندیگ اَنت
زندگی جنگے ءُ منی سِلاہ ارسے
کار نہ دنت شئیر ءُ شائری درسے
نوں عمر پِیر ءُ آجز ءُ جَستیں
ما چُنیں اھدے زندگی گوستیں
راجی ورناھاں سوھوئے رستیں
راج تپاکی ءِ چیدگے بستیں
گار کُتیں کِسّہ کینگ ءُ کَستیں
چار سد ءِ دیم ءَ بس اَتنت شستیں
پاگ ءِ آجوئی ماں سرا بستیں