نبشتانک: رَد نبیسّگ ءِ نُشکان
ندکار: ابدلّتیپ ءُ مھمد امران بلوچ
دی بلوچستان پوسٹ
ما تچک بہ زان ایں کہ زِندگیں راجانی زبان ھما وھد ءَ دیمروی کن اَنت وھدے کہ آیانی راجی زُبان ماں وانگجاھاں وانینگ بیگ ءَ انت پد ءَ ماں یک وتواجھیں استانے ءِ رِد ءُ رھبندانی آسر ءَ ھما زُباناں سرکاری درجگ دیگ بیت گُڑا توری ھالتاک، روتاک، ماھتاک ءُ میتگانی دُکان، نادْرھجاہ ءُ پولیس ایسٹیشن بزاں توری ھر وڑیں جاھے بہ بیت اود ءِ آیانی زُبان نبشتہ بیت۔ چہ ایشی ءِ ابید تامُر، کارٹون ءُ گِندگُش وڑیں دگہ بازیں آسراتی ھم پہ زُبان ءِ دیمروی ءَ بلاھیں کُمک اَنت۔ بلے بہ گِند ئے بلوچ یک گلام ءُ زیردستیں راجے پمیشکا مئے بلوچ راج ءِ راجی زُبان براھوی ءُ بلوچی مارا ماں وانگجاھاں وانینگ نہ بنت چریشی ءَ مئے راج ءِ پدریچ یکشل ءَ چہ وتی راجی زُبانانی وانگ ءُ زانگ ءِ لِزت ءَ زبھر انت چمیشکا مرچاں ما ھر وانِندگیں بلوچے بہ گند ایں کہ ماں وتی بلوچی گُپتاری ءَ درآمدیگیں زبانانی گالاں گیشتر کارمرز کنت۔ سَک بژن انت کہ بلوچی تامُرانی ازمکار ھم راجی زُبان ءِ زگریں گالاں ڈالچار کن اَنت ءُ بلوچی ٹَوکانی لاپ ءَ ھندی ءِ گالاں ماں تامُراں توار کش کن اَنت۔
چوناھیگا منی نبشتانک ءِ بُنگپّ وَ رَد نبیسّگ ءُ آئی ءِ نُشکان ءُ تاوانانی سر ءَ اِنت پمیشکا نی من بُنگپ ءِ سر ءِ کایان ءُ وتی وس ءُ واک ءِ ھساب ءَ راج ءَ سرپدی دیگ ءُ جُھد کن آں کہ بلوچ سرجمیں دگنیا ءِ اولی راج اِنت کہ زورگریں زوراک ءِ ءُ دگہ درآمدیگیں زبانی دربرگ ءَ پنج یا شش سال زیان کنت بلے وتی جِند ءِ زبانانی نبشتہ دربرگ ءَ یک ماھے نہ دنت بزاں بلوچ راج پہ پارسی، ھندی، سندی ءُ سرائیکی ءِ نبشتہ دربرگ ءَ ھمے زبانانی کتاباں بھا زُور ایت ءُ آیانی درونتاں تا شش سال ءَ وان ایت بلے راج ءِ ورنائیں نودربر وتی جِند ءِ راجی زبان ءِ نبشتہ دربرگ ءَ بے درونتانی وانگ ءَ دربرگ ءِ سرجت جن اَنت ءُ بے درونتانی وانگ ءَ بلوچی نبیسّگ ءَ بُنگیج کن اَنت چمیشکا راجی زبان رد نبشتہ بوگ ءَ انت ءُ رَد نبیسّگ ءَ راجی زبان ءَ بے کساس تاوان ھم رسگ ءَ انت۔ ما تچک بہ زان ایں کہ دانکہ ما راجی زبان ءِ درونتاں مہ وان ایں ما ھجبر راست نبشتہ کت نہ کن آں بلکیں ما یکشل ءَ رد نبیسّ ایں ءُ مئے رَد نبشتگیں پوسٹ، نبشتانک ءُ آزمانک مئے وانوکاں ھم رد دے اَنت چریشی ءَ مئے منّوگِریں وانوک ھم بلوچی رد نبیسّگ ءَ ھیل گِر اَنت ءُ ایشی ءِ آسر ءَ راجی زبان بلاھیں اڑ ءُ اڑانداں دُچارکپ ایت۔
البت بلوچی مئے وتی جِند ءِ ماتی ءُ راجی زبان اِنت پمیشکا ما ابرمی وتی راجی زبان ءَ ٹوک ءُ توار کت کن ایں ءُ بلوچی وانگ ءَ ھم سرپد بہ ایں بس ما اشتاپ مہ کن ایں بلکیں ما پیسر بلوچی زبان ءِ درونتاں ھورتیں چمشانکے بہ دے این ءُ پد ءَ پہ بلوچی لبزانک ءِ زانگ ءَ بلوچی نبشتانک ءُ آزمانکاں وان ایں۔ بزاں باید اِنت مارا پہ راجی زبان ءِ راست نبیسّگ ءَ بلوچی ءِ دھیں درونت وانگی اَنت کہ مارا پہ راست نبیسّگ ءَ آسانی بہ بیت۔
چہ ایشی ءَ ابید مئے ھرکس ءِ راجی زمہ واری انت کہ ما وتی کِر ءُ کش ءِ بلوچ راج ورناھاں راجی زبان ءِ وانگ ءُ نبشتہ کنگ ءِ سکین بہ دے ایں ءُ آیاں ھمے دزبندی بہ کن ایں کہ وتی چاگِردی رسانکدر بلوچی ءَ گپ ءُ رپ بہ کن ایں۔ راج ءَ ماں وتی گْوانکواں بلوچی آبینکدار(کیبورڈ) ءُ بلوچی بزانبلد(ڈکشنری) ایرگیج کنگ ءِ سرپدی ھم بہ دے ایں کہ مرچیگیں دامگ ءِ زمانگ ءَ بلوچی لبزانک ءِ ٹوھیں آسراتی ھمیش اَنت۔ ھر کسے کہ بلوچی وانینگ ءَ زبر انت باید انت آ بلوچی وٹس ایپی گلاں ٹھین ایت ءُ وتی سْیاد ءُ وارساں ماں وٹس ایپی گل ءَ راجی زباناں بہ وانین ایت۔ دومی ما مُدام بلوچی جْوانیں نبشتانک، درونت ءُ آزمانکاں وٹس ایپی وانگجاہ ءُ پیسبُکی گلاں شِنگ کنائین ایں کہ بلوچی زبان ءِ لبزانک البار بہ بیت ءُ ھر بلوچ ءَ سرپدی بہ بیت کہ بلوچی زبان ھم یک نبشتہ رھبند ءُ لبزانک ءِ واھندے انت ءُ ماں وٹس ایپ ءُ پیسبُک ءِ بلوچی لبزانکی گلاں وتی سْیاد ءُ سنگتاں ھم ھوار کن ایں کہ بلوچی وانگ ءُ نبشتہ البار بہ بیت۔
بلوچ شالا وتی ڈیھ ءِ وتواجہ بہ بات اَنت، راج ماں وانگجاھاں وتی راجی زباناں وانات اَنت ءُ بلوچی دیمروی کنات۔ شالا انچوش بات۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت