کریمہ بلوچ ءِ “کوش”: کوھلو ءَ زھرشانی، روانک

دی بلوچستان پوسٹ

نامی ئیں بلوچ راجدوست رھشون ءُ بلوچ نودربر گل آزاد ءِ گوستگیں سروک بانک کریمہ بلوچ ءِ ناگتی “کوش ” ءِ ھلاپ ءَ بلوچستان ءِ شھر کوھلو ءَ بلوچ یکجھتی کمیٹی ءِ دزبندی ءَ زھرشانی روانک ءُ روانک کشگ بیتگ اَنت-

آیانی دستاں پلے کارڈز ءُ بیننرز بیتگ اَنت ءُ مردماں بازیں کچے ءَ بھر زرتگ ءُ شھر ءِ جتا جتائیں دگاں تران بیتگ اَنت – چریشی ءَ پد روانک ءَ بھر زیروکیں مردم بنجاھی بازار ءِ چار راہ ءِ سر ءَ مُچ بیتگ ءُ زھرشانی اش کرتگ – ھمے وھد ءَ بھر زیروکیں مردماں تران کنان ءَ گْوشت کہ بلوچستان ءِ سرڈگار چہ بنداتی روچاں بلوچانی واستا بز آرگ بیتگ بلے بلوچ دنیا ءِ کجام ھم کُنڈا پھریزی نہ اَنت –

تران کنوکاں گْوشت کہ میان اُستمان ءُ انسانی ھکانی ادارہ بلوچ نسل کُشی ءِ سر ءَ بے تواری ءَ نشتگ ءُ ندارگ چارگ ءَ اَنت –

آیاں گْوشت کہ کریمہ بلوچ جنگ ءِ چیدگ اِنت ءُ آئی ءِ پکر ءُ ھیال مئے رھشونی ءَ کنان کن اَنت –

آیاں گْوشت کہ بلوچستان ءِ مڈی ءُ کوھانی سر ءَ زورگری بیگ ءَ اِنت، بلوچستان ءِ دمگ کوھلو ءَ گیس کمپنی ءِ نام ءَ کربانی کلدارانی پوڑی بیگ اِنت بلے دمگی مردماں یک گور کنگ ءُ مزنیں آپسراں ءُ لھتے وتمانی مردمانی پنجگاں گرم کنگ ءَ اَنت –

زھرشانی کنوکاں گْوشت کہ بانک کریمہ بلوچ ءِ جد ءُ جھد بلوچستان ءُ بلوچانی سربلندی ءِ واستا بیتگ مروچی آئی ءَ لھتے مردم ھندوستان ءِ “ایجنٹ “گوش اَنت آ گوشاں پچ بہ کن اَنت ءُ بہ اشکُن اَنت کہ بلوچستان ءِ ھمک مردم راجی ھکانی واستا گپ کنت آ گدارے؟

روانک ءُ زھرشانی ءَ سیاسی باسک، نودربر، وکیل، تاجر برادری ءَ ھوار جتا جتائیں تکاں بندوکیں مردماں بھر زرتگ ءُ کینیڈا ءِ سرکار ءَ لوٹ کرتگ ھُ گوشتگ کہ کریمہ بلوچ ءِ کوش ءِ زوت پَٹ ءُ پول کنگ بہ بیت ءُ بلوچستان ءَ انساپ دیگ بہ بیت –

زانگ بہ بیت چہ بلوچستان ءَ درانڈیھ بلوچ نودربر گل آزاد ءِ گوستگیں چیئرپرسن کریمہ بلوچ ءِ ناگتی “کوش ” ءِ ھلاپ مروچی یازدھمی روچ ءَ ھم بلوچستان ءَ زھرشانیانی درچ برجاہ بیتگ اَنت –

کیچ ءِ دمگ دشت ءِ ھند بلنگور ءَ سر بیتگیں ھالانی رد ءَ مروچی بیوکیں زھرشانی روانک پوج ءَ داشتگ –

زانگ بہ بیت گوستگیں روچ ءَ بلوچ یکجھتی کمیٹی ءِ رھشونانی نیمگ ءَ شال ءِ پریس کلب ءَ پریس کانفرنس کنان ءَ گوشتگ کہ بلوچستان ءِ بازیں جاھاں لشکری کارندہ زھرشانی روانکاں مردماں تریسنگ ءُ روانکاں دارگ ءَ اَنت –

آیاں گوشت کہ چہ انسانی ھکانی میان اُستمانی گلاں گوں دزبندی اِنت کہ آ بلوچستان ءَ گپ جنگ ءِ آجوئی ءِ واستا گامگیج بہ زور ایت ءُ بلوچانی سر ءُ بیوکیں زوراکیاں بہ داریت – ھمے وھد ءَ بلوچ یکجھتی کمیٹی ءِ نیمگ ءَ “گرینڈ احتجاج ” کنگ ءِ جار جتگ ءُ گوشتگ کہ اے درچ ءِ اولہ زھرشانی دو جنوری دوھزار ءُ بیست ءُ یک ءَ شال ءَ کنگ بیت اِنت –

ھمے وڑ ءَ مروچی شال ءِ بازیں جاھاں بلوچ یکجھتی کمیٹی ءِ نیمگ ءَ زھرشانی ءِ واستا پنتاک “پمفلیٹ ” ءُ دیوالانی سر ءَ نبشتگ کنگ بیتگ اَنت –