شال ءَ بیگواھیں مردمانی ھاتر ءَ برجاہ داشتگیں زھرشانی ءَ چار ھزار ءُ یک سد ءُ پنجاہ ءُ شش روچ سرجم بیتگ –

دی بلوچستان پوسٹ

انسانی ھکانی گل، شھری گل، سول سوسائٹی ءُ راجداریں گلاں ریاستی ھاکمانی دیم پجّار اتگ – ماما قدیر بلوچ

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ بنجل ءَ مروچی چار ھزار ءُ یک سد ءُ پنجاہ ءُ شش روچ سرجم بوتگ –
پی این وائی ءِ بنجاھی سرکماش کریم فراز ءُ آئی کابینہ ءِ سنگتاں بنجل ءِ تر ءُ تاب کرتگ ءُ بیگواھیں مردمانی کھولاں گوں پدردی درشان اِتگ ۔

وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی گون ءَ باوست کنان ءَ گوشتگ کہ جونانی دور دیگ ھاکمانی لوٹ انت، بیگواھیں مردمانی یل کنائینگے ھاترا پُرایمنیں جد ءُ جھد کنوکانی زانگولیں جون واتر بوتگ ءُ اتکگ انت – دو روچ ءَ پیش تربت ءِ دمگ ھیرونک ءَ ریاستی ادارھانی جوڑ کرتگیں ڈیت اسکواڈ ءِ کارمنداں دو بلوچ ورنا تیرانی آماچ کُتگ ءُ کُشتگ اَنت-

آئی ءَ دیمتر ءَ گوشتگ کہ ریاست وتی کپتگیں مالی ءُ لٹ ءُ پُل ءِ ساھے رکینگے ھاتر ءَ ھر وڑ ءَ کنگ ءَ اِنت، لوگانی سوچگ، ھالکار ءُ شاھزانتانی شھید کنگ، پروفیسراں آوار جنگ بیگواہ کنگ، زالبول ءُ زھگاں آوار جنگ ءُ ٹکانی وت ماں وت ءَ میڑینگے پالیسیانی سر ءَ پُرکار انت –

ماما قدیر بلوچ ءَ گوشتگ کہ انسانی ھکانی گل، شھری گل، سول سوسائٹی ءُ راجداریں گلاں ریاستی ھاکمانی دیم شری ءَ پجّار اِتگ ءُ آھانی تہ ءَ یک ھدے ءَ تاں گپ جنگے ھاٹیگ پیدا بوتگ بلے اے لٹ ءُ پُل ءِ نزام پُرایمنیں جد ءُ جھد ءَ چہ نزور کنگ بیت –