ازمکار، تامرکار سنی دیول جھانی وبا کرونا ویروس ءِ آماچ

سر بیتگیں ھالانی رد ءَ ھندوستان ءِ تامرکار ءُ ازمکار سنی دیول کرونا ویروس ءَ گپتگ –

دی بلوچستان پوسٹ

سنی دیول ءَ وتی چاگردی رسانک ٹویئٹر ءَ ٹویٹ کنان ءَ گْوشتگ کہ من کرونا ویروس ءِ ٹیسٹ کرتگ چریشی ءَ چہ منی جان ءَ کرونا ویروس ءِ نادراھی پدر بیتگ –

آئی ءَ گْوشتگ کہ کرونا ویروس ءَ پد آئسولیشن ءِ تہ ءَ اَنت ءُ جان ڈڈ ءُ شریں رنگے ءَ سما کنگ ءَ آں –

آئی ءَ گْوشتگ کہ منی گون ءَ نند ءُ ھور بیتگیں مردم وتی ٹیسٹاں بہ کن اَنت ءُ وت ءَ بہ ڈب اَنت ءُ وتی پھریز ءَ بہ کن اَنت –

زانگ بہ بیت ھندوستان اے وھد ءَ جھانی وبا ءِ تہ ءَ دومی نمبر ءَ اِنت ءُ ھندوستان ءَ کرونا گپتگین مردمانی کچ نود ءُ چار لَک ءُ نود ءُ نُھ ھزار ءَ گیش بیتگ اَنت ءُ بیران بیتگیں مردمانی کَچ یک لَک ءُ سِی ءُ ھشت ھزار ءَ گیش ءَ سر بیتگ اَنت –