شال ءَ بیگواھیں مردمانی ھاتر ءَ برجاہ داشتگیں زھرشانی ءَ چار ھزار ءُ یک سد ءُ چل ءُ ھشت روچ سرجم بیتگ

وائس فار بلوچ مسنگ پرسنز ءِ رھشون گوستگیں روچاں بیگواھی ءَ پد یلہ بیوکیں ڈاکٹر لیاقت سنی ءِ گون ءَ دُچار کپتگ انت-

دی بلوچستان پوسٹ

بلوچستان ءِ بنجاھی شھر شال ءَ پاکستانی گلانی دست ءَ گار ءُ بیگواہ بوتگیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی چار ھزار ءُ یک سد ءُ چل ءُ ھشت روچ سرجم بوتگ –

کلات ءَ چہ چاگردی باسک خیرجان بلوچ، نعیم بلوچ، داد محمد ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اِتگ –

وائس فار بلوچ مسنگ پرسن ءِ سرکماش نصراللہ بلوچ ءُ کمک سرکماش ماما قدیر بلوچ ءَ گوں بانک حوران بلوچ ءِ ھمراھی ءَ گوستگیں روچاں زورانسری آوار جنگ ءُ بیگواہ بوگ ءَ پد یلہ بوتگیں پروفیسر ڈاکٹر لیاقت سنی ءِ گون ءَ آئی ءِ لوگ ءَ دچار کپتگ انت-

نصراللہ بلوچ ءَ چاگردی ترامجاھاں اے درگت ءَ گوشتگ کہ پروفیسر لیاقت سنی ءِ یل بوگ ءَ پد ما آئی ءِ گون ءَ دُچار کپتگ انت، آئی ءِ گِس ءَ شادمانی بوتگ ، الم بیگواھیں مردمے ءِ یلہ بوگ ءَ پد آئی ءِ کھول ءُ سیاد ءُ وارسانی ھاتر ءَ اے روچ زندے وشتریں روچاں چہ یکے اللہ بہ کنت دُرسیں بیگواھیں مردم یل بہ بنت ءُ آھانی لوگ ءَ ھم شادمانی بہ بیت –

شال ءِ پریس کلب ءِ دیم ءَ برجاہ داشتگیں وائس فار بلوچ مسنگ پرسنز ءِ زھرشانی بُنجل ءَ اتکگیں مردمانی میان ءَ ماما قدیر بلوچ ءَ گوشتگ کہ دنیا تاکتور ءُ نزوریں یا تاکتورانی میان ءَ درونت گرگے واستا جد ءُ جھد میان ءِ بھر انت دنیائے تھا ھما راج شرپ ءُ ازت ءِ گون ءَ وتی ڈیھ ءَ نشت کنت کہ پُرایمنیں جد ءُ جھد ءَ گوں تاکت ءَ دیم پہ دیم بیت اِنت –

آئی ءَ دیمتر ءَ گوشتگ کہ گوستگیں ھپتاد ءُ سَے سالاں بلوچستان پاکستانی پوج ءُ آئی ءِ جھلی ادارھانی لگتمالی ءِ انت، مروچی بلوچستان ءِ نود درسد بھرے سر ءَ کاروائی برجاہ انت – ریاست ءِ بہ جن ءُ بہ کُش چگل بہ دے پالیسی ءِ سر ءَ بے وسیں سیاسی باسک، ادیب، شائر، وکیل، ڈاکٹراں نیم پوجی ادارہ ایف سی آوار جنت ءُ بیگواہ کنگ ءَ پد سالاں سال ازیت دیگ ءَ پد آھانی تیر سپتگیں زانگولیں کرتگیں جوناں دور دنت –

گُڈسر ءَ ماما قدیر بلوچ ءَ گوشتگ کہ راجدپتر ھما وھد ءَ الم وت ءَ پدراھی کنت وھدیکہ آ اے سُھتانی دیمپانی بیت مروچی بلوچ ایرانی گجر ءُ پاکستانی پنجاپی زوراکی دیمپان انت کہ آئی ءِ درمان پُرایمنیں جد ءُ جھد انت-