نبشتانک: یک میتگے ءِ بزّگیں بلوچانی نمدی یے پہ وتی رھشون ءُ واکداراں
نبشتہ کار:- عبیداللہ کلمتی
دی بلوچستان پوسٹ
مئے رھشون ءُ واکداراں! ما زان اِیں کہ شُما مارا پجّاہ نیار اِت ما ھما میتگ ءِ مردم اِیں کہ شما گچینکاریانی وھد ءَ مئے میتگ ءَ اتک اِت ءُ مراگشے جوڑ کُت ءُ مارا گوں وتی دْروگیں گپّاں رَد دات۔ ءُ انچیں گپ جت، کہ چہ شمئے اے گپّاں ما ھمے پھم اِت کہ شما نی مئے سرجمیں جیڑھاں توجیلّ کن اِت۔
شما گُشت: کہ ما وھدے گچینکاریاں سوبین بہ بہ اِیں شمئے سرجمیں جیڑھاں توجیل کن اِیں، شمارا آپ دے اِیں، شمئے چُکّانی واست ءَ دربرجاہ ءُ لیبجاہ جوڑ کن اِیں، شمئے میتگ ءَ نادْراھجاہ ءُ تْرھجاہ جوڑ کن اِیں، دَگ(سڑک) جوڑ کن اِیں، شمارا بجلی ءُ گیس دے اِیں، بلے وھدے کہ شما کہ گچینکاریاں سوبین بوت اِت گُڑا وتی کُتگیں گپ بے ھال کُت اَنت، وتی زبان وارت۔
مئے ءُ مئے میتگ ءِ مردمانی بے اگلی ءَ شما سوب کُت ءُ مارا رُنگراھاں دَور دات۔ وت نشتگ اِت ماں مزنیں کُرسیانی سر ءَ تماشا کنگ ءَ اِت، شمارا مئے مارِشت ھم نیست کہ ما چون وار ءُ بزّگ اِیں، پہ پِٹّے آپ ءَ ما برے اِد ءَ ءُ برے اود ءَ تلوسگ ءَ اِیں، پہ چُنڈے نگن ءِ واست ءَ چون در پہ در اِیں، مئے چُکّاں پہ وانگ ءَ وانگجاہ ءُ وانینوک نیست، مارا پہ وتی تیمّارگ ءِ واست ءَ نادْرھجاہ نیست، مارا نا روزگارے رس اِیت، نا مئے مُلک ءَ سڑکّے ھست، نا بجلی ءُ گیس ھست، زند ءِ دْرستیں الّمی ئیں آسراتیاں ما زِبھر اِیں، شمارا ھچ مئے سما ھم نیست۔
پِٹّ ءُ لانت بات شمارا کہ گوں مئے اوٹاں شما تماشا کنگ ءَ اِت ءُ بلے مئے ھچ پِگر ءَ ھم نہ کن اِت۔ شما بلوچ ھم نہ اِت چی ءَ کہ بلوچ وتی زبان ءَ کدی نہ وارت بلے شما وتی زبان وارتگ۔ مئے جیڑھانی توجیلّ کنگ وتی جاہ ءَ، مئے مادن ءُ زمیناں ھم درد ءُ لاپ کنگ ءَ اِت گوں وتی واجھاں ھور، بلے اے گپّ ءَ یات بہ کن اِت کہ وھد یکّش ءَ یکّیں ڈَول ءَ نہ بیت، وھد مٹّ بیت، ءُ اے گپ ءَ ھم یات بہ کن اِت اگاں اِد ءَ شمارا کس جست نہ کنت بلے پاکیں پروردگار مئے ھکّانی بابت ءَ الّم شمارا جست کنت،شمارا پسّو دیگی اِنت۔
اشی ءَ شما ھم الکاپ ءَ زان اِت کہ بلوچانی بزگی ءِ بن ما اِنت ءُ ما ھمے بزگانی مال ءُ مڈیاں ھڑپ کنگ ءَ ایں ءُ اشی ءَ ھم شما زان اِت کہ بلوچانی نیزگاری ءِ بُن مئے اندر ءَ چِست بیتگ –
بلے وایے بے سمائی کہ لھتے ھنچیں مردم ھست اَنت کہ آیاں وتی میتگانی سُد ءُ سما نیست ءُ تھنا ھما وھد ءَ سما ءَ کپ اَنت کہ بے واکیانی تہ ءَ بُڈ اِتگ اَنت ھما وھد ءَ گوشگ ئیگ ءَ سرجمیں زند ءَ اے مردماں پہ میتگ ءَ وت ءَ دلاپ کتگ بلے منی جند ءَ تنی وھدی چوشیں مردمے ءِ دست نہ دیستگ اَنت آ پہ وتی مردماں رھمدلی ءِ چِست بہ بیت-
گوں ھمے بَدیں دوا ءَ ما وتی نمدی ءَ ھلاس کن ایں اللہ شمارا ماں سرجمیں دنیا ءَ رزواہ بہ کنات ءُ مئے ھکّ شمئے لاپ ءَ درد بات اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔