پاکستان ءِ سروزیر تربت ءِ تر ءُ تاب ءَ آیگی، شھر ءَ ابید ءِ جار ءَ ترندی

دی بلوچستان پوسٹ

پاکستان ءِ سروزیر عمران خان تربت ءِ تر ءُ تاب ءَ آیگی اِنت دمگدار ءِ نیمگ ءَ شھر ءَ ابید ءِ جار ءَ ترندی، کار ءُ بار ءُ وانگی ادارہ بند کنگ بیتگ اَنت ءُ وھدیکہ مُچے ءَ ابید لس مردم شھر ءِ آیگ ءَ بند کنگ بیتگ اَنت –

دی بلوچستان پوسٹ پتر ءَ سر بیتگیں ھالانی رد ءَ پاکستان ءِ سروزیر عمران خان سیزدہ نومبر آدینگ ءِ روچ ءَ تر ءُ تاب ءَ آیگی اِنت لشکری گشتگیں گپ ءُ زرباری بلوچستان ءِ دیمروی ءِ کارانی واستا پوڑی دیگ ءِ جار ءَ جَنت –

آئی ءِ تر ءُ تاب ءِ سوب ءَ دمگدار ءَ کیچ ءَ سیزدہ نومبر ءَ تربت ءِ شھر ءَ ابید ءِ جار ءَ ترندی ءِ جار پِرینتگ – سیزدہ نومبر ءَ پھازدارانی یک منّگ نامھ ئِے سر ءَ شھر ءِ دراھیں سرکاری ءُ زری وانگ جاہ ءُ ھسپتال کنگ بنت چریشاں ابید باپاری رھشوناں ھم ڈاہ دیگ بیتگ اے روچ ءَ دربندی بہ کن اَنت، چریشی ءَ ابید دراھیں وانگجاھاں ڈاہ دیگ بیتگ کہ سیزدہ نومبر ءَ کرکٹ اسٹیڈیم ءَ عمران خان ءِ مچے ءَ نودربرانی ھمراھی ءَ وت ءَ جاڑیگ بہ کن اَنت کہ چریشی ءِ مول ءُ مراد مُچے ءِ مردمانی گیش کنگ ءُ سروزیر ءَ را اے سدکی دیگ کہ کیچ ءِ مردم سرکاری شوربندیاں گوں ھمگرنچ اَنت –

ھمے وڑ ءَ پھازداراں سیزدہ نومبر ءَ دگانی بند کنگ ءُ بس ھما مردماں موکل دیگ بیت کہ آیانی گاڑی ءُ پرپٹاں ھاکمانی پاٹی پی ٹی آئی یا باپ ءِ بیرک بیت اِنت ءُ آ مُچے ءَ بھر زور اَنت –
مھلوک ءِ نیمگ ءَ پھازدارانی گوشتگیں ڈاہ ءِ ایرجنی بیتگ –