پنجگور ءَ یک مردمے ءِ جون دزکپتگ

دزکپتگیں جون ءِ سیادی ءَ سرکار ءِ چیردستی ءَ برجاہ کرتگیں ٹولی ءِ مردمے گوشگ ءَ اَنت –

دی بلوچستان پوسٹ

بلوچستان ءِ دمگ پنجگور ءَ یک مردمے ءِ جون دزکپتگ کہ آئی ءِ پجار جاوید ء حسن ءِ نام ءَ زانگ بیتگ –

سر بیتگیں ھالانی تہ ءَ گوشگ بیتگ کہ کُشتگیں مردم گوستگیں شپ ءَ کُشگ بیتگ کہ آئی ءِ جان ءَ لٹ ءُ کُٹانی نشان ھم پِر اَنت –

دمگی مردمانی رد ءَ کُشتگیں مردمے سیادی پاکستانی پوج ءُ چیریں ادارھانی چیردستی ءَ برجاہ کرتگیں ڈیتھ اسکواڈ ءَ بیتگ کہ آ پروم ءِ نندوک بیتگ بلے اے وھد ءَ وڈھ ءَ شتگ –

دمگی مردمانی رد ءَ گوستگیں شپ ءَ پنجگور ءِ کُچگی دمگ ءَ لیویز ءَ دُزی ءِ ھال سر بیتگ – لیویز ءِ کارندہ دُز ءِ گرگ ءَ سوبمند بیتگ اَنت اے مرد لیویز ءِ دست ءَ کُشگ بیتگ – بلے لیویز ءِ گوشگ اِنت مارا یک جونے دزکپتگ –

کُشتگیں جون بجار شمے زئی نامی ئیں مردے ئے ناکوزتک گوشگ بیگ ءَ اِنت کہ آئی ءِ سر ءَ بھتام اِنت آ ڈیتھ اسکواڈ ءِ سروکی ءَ کنگ ءَ اِنت – چریشی ءَ پیسر آئی ءِ زامات پنجگور ءَ سلاہ بندیں مردمانی اُرش ءَ کُشگ بیتگ اَت –

زانگ بہ بیت بلوچ راجدار ءُ چاگردی مردمانی رد ءَ پاکستانی پوج ءُ چیریں ادارھاں سرجمیں بلوچستان ءَ ڈیتھ اسکواڈ شنگ ءُ شانگ کرتگ کہ آ بلوچ آجوئی لوٹوکیں سلاہ بندانی بگیری ءَ اوشتارینتگ اَنت – ھمے وڑ اے مردماناں نشہ بھا کنگ، آوار جنی ءَ ملامگری ءِ اجازت دیگ بیتگ اَنت دانکہ اشانی زری جاور شر بہ بنت –

بلوچانی گوشگ اِنت کہ اے ٹولی بلوچستان ءَ زورانسری آوار جنیاں ھم دزمانجن اَنت بلے تنی وھدی لشکری بنشون ءِ نیمگ ءَ اے درگت ءَ ھچ گپ پیش کنگ نہ بیتگ اَنت –

ڈیتھ اسکواڈ ءِ کارندھاں ھروھد ءَ بلوچ آجوئی لوٹوکیں سلاہ بند اُرش کنگ ءَ اَنت – چار روچ ءَ پیسر پنجگور ءِ دمگ گوارگو ءَ یک مردمے ءِ تیر سپتگیں جون دزکپتگ اَت کہ آئی ءِ پجار غلام جان ء عید مھمد جھمنند گوارگو گونی ءِ نام ءَ زانگ بیتگ اَت چریشی ءَ پد بلوچ ریپبلکن آرمی ءَ کُشتگیں مرد ءِ کوش ءِ زمہ واری منّ اِتگ اَت –

گل ءِ جارکش بیبگر بلوچ ءَ گوشتگ اَت کہ کُشتگیں مرد گوستگیں روچاں گوارگو ءَ پوجی لشکر کشی ءَ پاکستانی پوج ءِ ھمراھداری ءَ کنگ ءَ بیتگ –

گوستگیں ماہ ءِ گڈسر ءَ بلوچستان ءِ بنجاھی شھر شال ھزار گنجی ءِ ھند ءَ بمب اُرشے ءَ آزاد ھان مری نشانگ کنگ بیتگ اَت چریشی ءَ آزاد ھان مری ءَ ھوار سَے مردم مرتگ اِت اَنت ءُ بازینے زدگ بیتگ اِت اَنت اُرش ءِ زمہ واری بلوچ لبریشن آرمی ءَ منّ اِتگ اَت –

بی ایل اے ءِ جارکش جیئند بلوچ ءَ وتی درشان ءِ تہ ءَ گوشتگ اَت ریاستی چیریں ادارھانی جوانیں کارندہ ھاجی آزاد ھان مری گوں ھمراھاں “ وی بی آئی ای ڈی ” تراک ءِ نشانگ کرتگ، ھاجی آزاد ھان مری پاکستانی پوج ءُ چیریں ادارھانی گوشگ ءَ بلوچ سرمچارانی کھولاں بیھار دیگ، جھدکاراں دشمن ءِ دیم ءَ سرجھل کنگ ءَ لاچار کنگ، نیزگاریں بلوچانی زمینانی زورگری کنگ ءُ بلوچ سرمچارانی بگیری ءَ ڈیتھ اسکواڈ ءِ جوڑینگ ءِ راجی گداری ءِ گناہ ءِ تہ ءَ بیتگ –
زانگ بہ بیت شال ءِ بمب تراک ھنچیں وھدے ءَ بیتگ کہ وھدیکہ پاکستان ءِ ھمسنتیں پاٹی پی ڈی ایم ءِ مُچی برجاہ بیتگ واکداراں دلگوشی ءِ کلوہ شنگ کرتگ اَت –