چاگردی رسانکدراں شنگ بیتگیں ھالانی رد ءَ شال ءَ سیادی داروکیں آنلائن رسانکدر یوٹیوب ءُ فیسبوک ءَ اھوالکاری کنوکیں بائزید روشن خان ناشناسیں مردماں بیگواہ کُتگ۔
دی بلوچستان پوسٹ
اے درگت ءَ جلیلہ ھیدر ءَ وتی فیسبوک درشان ءِ تہ ءَ گوشتگ کہ “ ھالانی رد ءَ اھوال کار بائزید خان ناشناسیں مردماں چہ شال ءَ بیگواہ کُتگ۔
آ چاگردی رسانک ءِ پِڑ ءَ مھکمیں توار ءُ آئی ءَ چھوٹی چُڑیا نامیں یک تاک ءِ جوڑ کُتگ بیتگ کہ آئی ءِ سرءَ آئی ءَ اُستان ءَ بیوکیں سرکاری ءُ چاگردی زوراکی پدر کُتگ اَنت۔”
ھمے وڑ ءَ سردار اختر مینگل ءَ چاگردی رسانکجاہ ٹویٹر ءَ ٹویٹے ءِ تہ ءَ گوشتگ کہ مروچی بائزید خان آوار جنگ بیتگ ءُ اے درگت ءَ درستیں اھوالکاراں ھمگرنچ بیگ ءُ آوار جنی ءِ بگیری ءَ توار چِست کنگی اِنت کہ مروچی بائزید خان اِنت باندا دگہ یک اھوالکارے ھمے وڑ ءَ بیگواہ کنگ بیت اِنت وتی بے تواری ءَ بہ پروش اِیت ءُ اھوالکاری ءِ راہ ءُ رھبندانی رد ءَ ھمتوار بہ بئیت –
یات بہ بیت بلوچستان ءَ اھوالکارانی بیگواہ کنگ، آیاں لَٹ ءُ کُٹ کنگ ءُ باز براں ژانگولیں جونانی دور دیگ ءِ وئیل ھم دیم ءَ اتکگ اَنت۔
سیاسی ءَ چاگردی مردمانی گوشگ اِنت کہ چُشیں وئیلانی تہ ءَ گیشتریں وھداں پوج ءُ ایندگہ چیریں گلانی دزمانجن اَنت بلے تنی وھدی اھوالکار بائزید خان ءِ بیگواھی ءِ درگت ءَ آوار جنوکانی بارو ءَ گیشتریں سرپدی نہ بیتگ –