بلوچستان ءِ جتا جتائیں جاھاں تیرگواری، یک مردمے بیران ءُ پولیس کارمندے زدگ

دی بلوچستان پوسٹ

شال ءَ تیرگواری ءِ آسر ءَ ٹکی رھشون بیران بوتگ، نوشکی ءَ تیرگواری ءَ پولیس کارمندے زدگ بوتگ-

ٹی بی پی پتر ءَ سربوتگیں ھالانی رِد ءَ بلوچستان ءِ بنجاھی شھر شال ءَ پشتون آباد ءِ میتگ ءَ تیرگواری ءِ آسر ءَ ٹکی رھشون ءِ بیران بوتگ –

دمگی پولیس ءِ رِد ءَ مروچی بزاں سَے شمبے ءَ شال ءِ دمگ پشتون آباد ءَ سلاہ بندیں مردماں ٹکی رھشون حاجی محمود کاکوزئی تیر باران کُرتگ ءُ کُشتگ – تیرگواری کنوک تچگ ءُ رؤگ ءَ سوبمند بوتگ انت – بلے آھانی نام ءَ ارزی نبشتہ کنگ بوتگ ءُ آھانی شوھاز برجاہ انت –

بیران بوتگیں مردم ءِ لاش اژدری چار ءُ ٹپاس ءَ پد کھول ءِ گور ءَ سر کنگ بوتگ –

دومی نیمگ ءَ نوشکی ءَ تیرگواری ءِ آسر ءَ پولیس کارمندے ٹپی بوتگ –
اھوالکار ءِ رِد ءَ نوشکی ءِ دمگ قادر آباد ءَ تیرگواری ءَ یک پولیس کارمندے ٹپی بوتگ – ٹپی بوتگیں کارمند ھما دمان ءَ ھسپتال ءَ برگ بوتگ ءُ ٹپ درمان کنگ بوتگ –

پولیس ءِ رِد ءَ اے وئیل ھما وھد ءَ دیم ءَ اتکگ کہ پولیس کارمند جرمکارے ئے پٹ ءُ پول ءِ ھاتر ءَ آئی ءِ لوگ ءَ شتگ بوتگ انت کہ ھمود ءَ جرمکار ءَ تیرگواری کُتگ پولیس کارمند زدگ کُتگ –