دی بلوچستان پوسٹ
بلوچستان ءِ دمگ ھرنائی شاھرگ ءَ پاکستانی پوج ءَ بیڑ بُرتگ ءُ یک لوگے ءَ چار برات آوار جتگ ءُ بیگواہ کُتگ ـ
ٹی بی پی پتر ءَ سربوتگیں ھالانی رِد ءَ شاھرگ ءَ لونی تنک میتگ ءَ پاکستانی پوج ءَ سالو مری ءِ لوگ ءَ بیڑ ءُ زوراکی کنان ءَ آئی ءِ چار زھگ بازو، لانگو، رضو ءُ نیاز مھمد ء سالو مری زورانسری آوار جتگ انت ـ
ھندی اھوالکار ءِ رِد ءَ پاکستانی پوج ءَ گوستگیں شپ ءَ اے مردمانی لوگ چپ ءَ چاگرد ءَ انگیر ءَ کُتگ ءُ بیڑ برتگ، اے میان ءَ چُک ءُ زالبول ھم ترس ءُ بیھار دیگ بیتگ اَنت ـ چاریں مردم گپتگ ءُ ناشُناسیں جاھے ءَ برگ بیتگ اَنت ـ آوار جنی ءَ پد آھانی ھچ وڑیں ھال ءُ اھوال نیست ـ
زانگ بہ بیت بلوچستان ءِ جتا جتائیں دمگاں زورانسری آوار جنیانی رِد یکشل ءَ برجاہ انت ـ دومی نیمگ ءَ بیگواھیں مردمانی کھول کراچی ءُ شال ءَ وتی دوستگیں مردمانی پد جنگ ءِ ھاتر ءَ زھرشانی کنگ ءَ اَنت ـ