نبشتانک: بلوچ ءُ بلوچستان
نبشتہ کار: سازین بلوچ
دی بلوچستان پوسٹ
بلوچ ڈیپارٹمنٹ تُربت-
بالاچ وتی گس ءِ پیشگاہ ءَ نشتگ ات ءُ یک کوپے چاھے دست ءَ ات ءُ ڈاکٹر فاروق بلوچ ءِ کتاب “بلوچ اور اُن کا وطن” ءَ وانگ ءَ ات کمو ساھت ءَپد آئی ءَ سگریٹے بن دات ءُ کشگ ءَ بنا کُت ءُ دوت بارگ بارگ ءَ درایگ ءَ اِت اَنت ۔
ھمے دمان ءَ گوشگ ئیگ ءَ بالاچ ءَ ھجمبینگے ءَ ءُ گوشگ ءَ لگ اِت کہ بلوچ ءَ وتی چم بلوچستان ءِ دلبند ءَ پچ کتگ اَنت ھما انت گون جنگی کسھاں دوچار انت، پہ درور ھمل جئیند، کمبر، چاکر ءُ گْوھرام ءُ دگہ باز کسہ ھم ھست اَنت۔ بلے دژمن ءِ دیم ءَ سر ءِ جھل نہ کتگ ءُ نہ اوشتاتگ اَنت۔ بلوچستان جنگجاھی بنجلے جوڑ کرتگ۔ بلوچ ءِ ھمک گام آشوب اِنت، بلوچ ءِ گریوگ ءِ توار آشوب ءِ میستاگ اَنت، بحتی ءِ ھون آشوب ءِ رنگ ءَ اَنت، برمش ءِ پریات آشوب انت، کلسوم ءِ درس آشوب انت، ھمے آشوب اِنت کہ مرچی چار راھانی سر ءَ مات ءُ گھار در اتکگ انت انساپ لوٹگ ءَ انت بلے بیاکہ ھمے آشوب ءَ نمیرانیں شھداد ءُ احسان ءُ حیات جان ءِ رتکگیں ھوناں، تربت ءِ دہ سالی ئیں راجدپتر پد ءَ نوک کت۔ اگاں مکھیں ماتانی چیھانٹاں ایش کُنگ لوٹ ئے یا آشوب ءِ راہ ءُ راہ بنداں سرپد بوھگ لوٹ ئے گُڑا بیا بلوچستان ءَ ۔
“ھما کہ درد ءِ تورشتان نہ زانت ایں
منی شھر ،منی ھلک،منی ڈیھ بلوچستان ءَ بئیت۔
ھما کہ رتکگیں ھونانی پریاتاں نہ پھم ایت ءُ نہ مار اِیت
آ کیچ، دشت، کاھان، کوھلو، پنجگور، بلیدہ، زامران ، حضدار، چاغی ءِ پرسیگیں دمک ءُ درانی ھرسیگیں مات ءُ گوھارانی چماں وتی چماں سک بہ دنت ءُ الکاپی ءَ یک نگاھے ءَ بہ چار اِیت ءُ پد ءَ دو بر وتی چمانی شانکاں دور نہ بارت –
ھما کہ مکھیں ماتانی چیھانٹاں گدار اشک کنگ لوٹ اَنت
حیات ، خالد، برمش ءُ کلسوم ءِگس ءَ بھشتیں مکران ءَ منی ھلک ءَ منی ڈیھ بلوچستان ءَ بئیت”
بالاچ گون جیڑگاں گپ ءُ گال کنگ ءَ ات آئی ءِ دست ءِ سگریٹ پر بوت ءُ ھلاس بوت۔
آئی ءَ دگہ سگریٹے بن دات ءُ وتی دیریگیں سنگت ءِ درگت ءَ جیڑگ ءَ گلائش بوت کہ حیات ءِ مکھیں مات ءِ پریات آجوئی ءِ رنگ ءُ دروشم ءَ انت، ءُ انچو کہ ڈاکٹر حنیف گش اِیت حیات ءِ مات بزگ نہ انت بلوچستان بزگ انت، حیات ءِ مات گریوگ ءَ نہ انت اے بلوچستان انت کہ گریوگ ءَ انت ءُ بانک کریمہ ھم درائین اِیت کہ حیات ءِ مات تھنا حیات ءِ مات نہ انت آ ھمک بلوچ ءِ مات انت۔
“مۓ ھلک ءِ کشک ءُ راھاں مرچاں ارشاد مردم گار باں
مۓ ھلک جنگی میتگ ءِ من نشتگاں ھیال بکن”
اگان تو کیچ ءَ کاھے گڑا نمیرانین شھداد ءِ گس ءَ برو آئی ءِ گھار ءِ ارسان بہ گند،احسان ءِ مات ءِ درداں بہ مار ءُ حیات ءِ آریپیں پت ءِ اندر ءِ پروشتگیں مارشتان بہ شوھاز ۔ کہ درد چنچو گران انت ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔