مستونگ ءَ پاکستانی پوج ءِ سر ءَ اُرش، اُرش ءِ زمہ واری بی ایل اے منّ اِتگ ـ

دی بلوچستان پوسٹ

ٹی بی پی پتر ھال ءَ سربوتگیں ھالانی رِد ءَ گوستگیں شپ ءَ مستونگ ءِ شھر ولی ھان ءَ لیویز تھانہ ءِ نزیک ءَ پاکستانی پوج ءِ گشتی ٹولی تراک ناکیں شوروانی نشانگ جوڑ کنگ بوتگ ـ

دمگی مردمانی رد ءَ تراک ءَ پد پاکستانی پوج ءَ مستونگ ءِ جتائیں دمگ انگیر ءَ کرتگ اَنت ءُ لشکر کشی بندات کُتگ ـ

دومی نیمگ ءَ مروچی بلوچ آجوئی لوٹوکیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کُرتگیں درشان ءِ تھا مستونگ ءَ پاکستانی پوجیانی سر ءَ بوتگیں بمب تراک ءِ زمہ واری منّ اِتگ ءُ گُشتگ کہ مئے سرمچاراں گوستگیں شپ ءَ بلوچستان ءِ دمگ مستونگ ءَ تیری روڈ ءِ سر ءَ پاکستان ءِ پیرا ملٹری فورس فرنٹئیر کور ءِ تر ءُ گرد کنوکیں ٹولی ءِ یک گاڑی ءِ ھما وھد ءَ وتی تراک ناکیں شوروانی نشانگ جوڑ کُرتگ کہ آ بلوچ میتگانی تھا فوجی گشت کنگ ءَ بوتگ اَنت ـ

جارکش ءَ دیمتر ءَ گُشتگ کہ بلوچ سرمچارانی اے اُرش ءَ پوجی گشتی ٹولی ءِ یک گاڑی ءَ سک باز تاوان رس اِتگ ءُ تراک ءِ آسر ءَ پوج ءِ بازیں کارمندے مُرتگ ءُ زدگ بوتگ اَنت ـ

جارکش جئیند بلوچ ءَ گُشتگ کہ بلوچ لبریشن آرمی مروچی یازدہ اگست ءِ روچ ءَ اے اھد ءَ کنت کہ بلوچ سرمچار زورگریں فوج ءِ سر ءَ ھما وھد ءَ تاں وتی اُرشاں تُرند ءَ چہ تُرند تر کنت وھدیکے بلوچ راج ءِ پچ گپتگیں آزاتی دوبر نہ گیپت ءُ زورگپتیں فوج ءَ بلوچ سرزمین ءِ سر ءَ دراھگ ءَ لاچار نہ کنت ـ