نبشتانک: گازائیل کشّاں مہ کُش اِت
نبشتہ کار: دھانی
دی بلوچستان پوسٹ
دْروت واجہ
دْرھبات ئے منی چُک ، چے ءَ پریشان ئے؟ ترا چیزے پکار اِنت؟
اناں واجہ!
گڑا؟
ناکو من دیست تو بار جتگ الّم ءَ رو ئے مرز ءَ!
ھو منی چُک، انشا ءَ اللہ من ھمے ارادہ کتگ
ناکو من ءَ گوں وت بہ برگوں پاکستان ءَ!
تو…؟ اناں منی چک تو دنیگا کسان ئے اے راہ پُر ھَتَریں راھے، ترا چُنت سال اِنت؟
واجہ من ءَ سیزدہ سال اِنت ۔
واجہ من زاناں کہ راہ ھرابیں راھے، بلے منی پِت ءُ بْرات ھمے راہ ءَ کار ءَ اَنت دو روچ اِنت شتگ اَنت ءُ دنیگا نیاتکگ اَنت، من ءَ گوں وت بہ بر داں آیاں بہ گْوشاں جلدی بیاینت ۔
۔ منی چُک وت ءَ پریشان مکن تئی پت شان کاینت اے انچیں دوریں راھے دو روچ ناں بربرے دو دو ھپتگ لگ ایت، شر اِنت گْونڈو تئی پِت ءِ نام کے اِنت؟
۔ واجہ منی پت ءِ نام ناسر اِنت، منی مات بے وڑ اِنت منی پت ءَ گوشتگ بوتگ کایاں ترا برا داکٹر ءَ!
چہ اے گپ ءِ اشکنگ ءَ سک دلپدرد بوتاں، جستوں کرت منی چک تئی مات ءَ زاناں چون اِنت؟
منی مات ءَ شومّک ءِ نادراھی اِنت چُنت رند ءَ ابّا ءَ گوں ھمے مرز ءِ کار ءُ بارانی ءِ زرانی سر ءَ نزیکیں داکٹراں برتگ بلے انّوں چیزکے وھد اِنت امّا گنتر اِنت، ابّا ءَ گْوشتگ اَت رو آں مرز ءَ ءُ کایاں ترا بر آں پاکستان ءِ داکٹراں!
۔ منی چک تو اے وھد ءَ باید اِنت وتی مات ءِ گْور ءَ بہ بہ ئے ءُ آئی ءِ ھیالداری ءَ بہ کن ئے، وت ءَ ڈڈ کن پچے تئی ارس رچگ ءَ اَنت؟ ارساں پَھک کن ۔
اناں منی چک من ترا گوں وت بُرت نکناں بلے ترا کول دیاں گوں تئی پت ءَ واتر بیاں، انوں کہ تئی پت ءُ مستریں برات اد ءَ نہ اَنت لوگ ءِ پُشپد تو ئے برو لوگ ءَ ندر آں ۔
گونڈو ءَ پورہ وتی مات بے ھال کرتگ اَت گوں منی اے گپ ءَ تچان تچان ءَ شُت میتگ ءَ!
من دیم پہ مرز ءَ رھادگ بوتاں، سجّھیں راہ ءَ گونڈو ءِ گپانی باروہ ءَ گوں وت ءَ جیڑگ ءَ اِتاں، داں من رس اِتاں بُلّو ءَ
چہ چہ دو سے نپر ءَ جستوں کرت چوشیں مردے شما جاہ کار اِت؟ آیاں گوشت ما چوشیں مردم پجّاہ نیار ایں، وتی باروں دات ءُ زرّوں گپت اَنت ءُ دیم پہ وتی ھلک ءَ رھادگ بوتاں، گوں وتوں گوشت بلکیں اینچوک ءَ ناسر شتگ میتگ ءَ،
راہ ءَ پیداگ اِتاں لھتے مردم ءَ من ءَ اشارہ کرت کہ راہ گجر ءَ بستگ مرو، من گوشت من رو آں پرچا کہ ناں منی گاڑی ءَ بارے پِر اِنت ءُ ناں گِلین!
شتاں دیمتر ءَ منی چم یک مُچّی یے ءَ کپت اَنت، اود ءَ کہ رس اِتاں من دیست کہ یک نیم اُمْریں مردمے گوں یک ورنایے ءَ کپتگ اَنت آیانی اسپیتیں پُچ سُھر اَنت چہ ھون ءَ مردم جستوں کت اَنت کہ چے بوتگ؟ گْوشت اِش سپاہ ءَ راہ بستگ ءُ اے دوئیں ھم جتگ اَنت ئِے،
ایشاں بار گون بیتگ اگاں ناں؟ توارے آتک کہ اناں ۔ انا للہ و انا الیہ راجعون!
چہ یکے ءَ جستوں کرت کہ تو ناسر ءَ زان ئے؟
۔ کجام ناسر ھما کہ سرباز ءِ نندوک اِنت؟
جی ھو ھمینکس زاناں کہ سرباز ءِ مردمے ءُ وتی چُک ھمراہ اِنت ئِے! ھمے ھَتّ ءَ کار ءَ اِنت، گْوشت ئِے اے کہ تیر ئِے لگّ اِتگ گوں وتی چُک ءَ نام ئِے ناسر اِنت، بلکیں تو ھمیشی ءَ گْوش ئے؟
نوں گپ ءَ لگ اِت کہ شریں مردمے اَت گوں ما ھمسپر اَت سک اِشتاپی اَت، اچ یکے ءَ کمو زرّ بدل کت ئِے ءُ گوشتگ اِت ئِے کہ منی چُک نادراہ اَنت ءُ…!
سوار بوتاں گاڑی ءَ گوں وتوں گوشت من وتی زرّاں دیاں ناسر ءِ چک ءَ داں وتی مات ءِ اِلاج ءَ بہ کنت، سجھیں راہ ءَ ھُدا ھُدا اوں کت کہ چہ منی رسَگ ءَ پیسر ایشانی لوگمان ءِ مردم ایشانی مرک ءَ سھیگ مہ بنت شر اِنت،
وھدیکہ رس اِتاں چار آں بازار میتگ شُلوک اِنت، بزاں ناسر ءِ لوگبانک بیران بوتگ اَت، چمّوں تھار بوت اَنت ءُ ارسوں شیوَل،،، چونیں بے وپائیں دنیایے،،،
گْوشتوں ناسر ءِ آ سیزدہ سالگیں چک کج اِنت؟ ۔ ( نام من جست نہ کتگ اَت )
آئی ءَ تاھیر آؤرت نہ کتگ بُرتگ اِش تْرو ءِ لوگ ءَ!
بگند ئے شما ایشی ءَ یک وسّریں کسّھے سرپد بہ بہ اِت، بلے اے مے بزّگیں راج ءِ ھال اِنت کہ ھر روچ گجر ءُ پنجاپ ءِ پوجانی دستاں گوں وڑ وڑیں نیمّونے ءَ کُشگ بوَگ ءَ اَنت!
ابید چہ مرز ءُ گازائیل یا کہ بَڈُّکی کار ءَ کہ اچ پاکستان ءَ زالبولی گُد ءُ پُچ کہ دولت آیاں کاچاک لیک ایت دگہ دَر نیست، بلوچ اچ بے کاری ءَ لاچار اَنت اے راہ ءَ پہ جن ءُ چکّانی لاپ ءِ واستا ءَ اے راہ ءَ گچین کنگ ءَ اَنت-
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔