بلیدہ پاکستانی پوج ءِ زمینی ءُ بُرزی بیڑ برجاہ
دی بلوچستان پوسٹ
بلوچستان ءِ دمگ بلیدہ ءِ جتاھیں ھنکینانی تھءَ پاکستانی پوج ءِ نیمگ ءَ چہ پوجی بیڑانی یکشلی برجاہ اِنت کہ تھءَ زمینی پوج ءَ چہ بُرز ءَ کمک رسگ ءَ اِنت۔
اھوالکاران ٹی بی پی ءَ ھال داتگ کہ جاڑیگ ءَ ھوار کش ءُ کِر ءِ ھنکینانی تھءَ پاکستانی پوج ءِ مزنیں کساس ءِ گوستگیں سئے روچاں چہ بیڑ بری ءَ دزگٹ اِنت۔ فورسزاں چہ برُزءَ کمک ھم رسگ ءَ اِنت کہ آودہ ہیلی کاپٹراں جتاھیں دمگانی تھءَ شیلنگ کنگ ءَ گندگ بیتگ اَنت۔
اھوالانی ردءَ پوجی کارمند جتاھیں میتگانی تھءَ بیڑ بری ءِ نیام ءَ لوگاں مان دارگ ءَ اَنت وھدے کہ روگ ءُ آیگ ءِ راہ بند کنگ بیتگ اَنت ۔
یات بہ بیت دو روچ پیسر پوج ءُ سلاہ بندیں مردمانی نیام ءَ مزنیں جنگءِ بندات بیتگ کہ دان بازیں ساھتاں جُنز اِتگ اَت۔ بلوچ سلاہ بندیں گل بی آر اَے ءَ وتی شنگ کُتگیں درشان ءِ تھءَ گوشتگ اَت کہ جنگءِ تھءَ آیانی یک کماندار ءِ نمیران بیتگ۔
دومی نیمگءَ چہ پوجی واکدارانی نیمگ ءَ چہ اے درگت ءَ ھچ وڑیں درشان شنگ کنگ نہ بیتگ۔
دو روچ ءَ پیسر ءَ کیچ دمگ جمک پیدراک ءَ ھم سلاہ بندیں مردمانی اُرش ءِ تھءَ پاکستانی پوج ءِ لانس نائک مرتگ اَت ءُ سئے سئے کارمند ٹپی ھم بیتگ اَت کہ اے اُرش ءِ زمہ واری آجوہ دوستیں سلاہ بندیں گل بلوچستان لبریشن فرنٹ ءَ من اِتگ اَت۔