بیگواھیں سندیانی نگیگیں جاور
ٹی بی پی شونگال
گوستگیں ھپتگ ءَ دگہ دو سندی راجداریں جھدکار زورانسری بیگواہ کنگ بیتگ اَنت۔ ستار ھکڑو چہ کراچی ءَ ءُ جاوید “خاصخیلی ” چہ سند ءِ دمگ نوابشاہ ءَ چہ دزگیری ءَ پد بیگواہ کنگ بیتگ ۔ ستار ھکڑو ءِ کھول ءِ رد ءَ آ گوست ءَ ھم “بیگواہ” کنگ بیتگ، کہ لھتیں وھد ء بیگواھی ءَ پد یل کنگ بیتگ ءُ اے سیمی رند اِنت کہ آ چُش بیگواھی ءِ آماچ کنگ بیگ ءَ اِنت۔ آئی ءِ کھول ءَ اے بیم ھست کہ بوت کنت اے رند ءَ نیاز لاشاری ءِ پیم ءَ آ ھم پد ءَ واتر مہ کنت؟ –
نیاز لاشاری سند ءِ” قومی ” مھاذ (آریسر ٹولی) ءِ یک کماشیں رھشونے اَت، کہ زور بیگواہ کنگ بیتگ۔ لھتیں وھد ءَ پد وھدے آ یل کنگ بیت گُڑا آ سند ءِ درستان مستریں شھر کراچی ءَ رکشہ جنزینگ ءَ بندات کنت۔ دومی رند ءَ 19 جنوری 2019 ءَ حیدرآباد آمِد گِس ءِ دیم ءَ چہ دزگیر کنگ ءُ بیگواہ کنگ بیتگ اَت، کساس یک سالے ءُ شش ماہ ءَ بیگواہ بیگ ءَ پد جون 2020 ءَ آئی ءِ ٹپ ءُ ٹوریں ءُ تیراں سُمبیتگیں لاش چہ کراچی ءَ دزکپتگ اَت۔
اے رد ءَ تھنا ستار ھکڑو ءِ کھول اے بیم ءِ آماچ نہ اَت کہ آیانی مھروان ءِ آسری نیاز لاشاری ءِ وڑ ءَ بیت۔ ھمے وڑ ءَ سندی راجداریں جھدکار عاقب چانڈیو 2018 ءَ سند ءِ شھر لاڑکانہ ءَ چہ آوار جنگ بیتگ اَت ءُ داں یک سالے ءَ بیگواہ کنگ بیتگ اَت، بلے 2019 ءَ آ یل کنگ بیت۔ بلے آئی ءَ آجوئی ءِ روچ داں باز وھداں دِست نہ کُت اَنت، آ ھمے سال ءَ 7 جون ءَ چہ کراچی ءَ یک رندے پد ءَ بیگواہ کنگ بیت۔ وھدیکہ آ ئی ءَ را بیگواہ کنگ ءُ برگ بیگ ءَ بنت گُڑا آئی ءِ گوھار ءُ جنین ھم لٹ شاپیانی آماچ کنگ بیتگ اَنت ءُ اے سرجمیں وھیل آیاں تامر بند کُتگ ءُ فیسبوک ءَ لائیو ھم پیش داشتگ اَنت، بلے اِشی ءَ پد ھم عاقب چانڈیو داں انگت ءخ بیگواہ اِنت۔
عاقب ءِ گوھار شازیہ چانڈیو ءِ رد ءَ کہ “وائس فار مسنگ پرسنز آف سندھ” (وی ایم پی ایس) ءِ یک سرپرکنوکیں جھدکارے ءُ آئی ءِ برات داں انگت ءَ گوستگیں بیگواھیانی سان ءَ چہ سرجمی ءَ دراہ نہ بیتگ اَت ءُ درمان بیگ ءَ اَت ۔
وی ایم پی ایس ءِ کنوینئیر سورٹھ لوھار ءِ رد ءَ داں انگت ءَ 60 ءَ چہ گیش سندی راجداریں جھدکار تھنا جون ءِ ماہ ءَ بیگواہ کنگ بیتگ اَنت۔ آئی ءِ بھتام اِنت کہ اے مردماں پاکستانی پوج ءُ چیریں گل بیگواہ کنگ ءَ اَنت۔ سورٹھ لوھار ءِ رد ءَ دان انگت ءَ تھنا جولائی ءِ ماہ ءَ 17 سندی راجداریں جھدکار دزگیر کنگ ءُ بیگواہ کنگ بیتگ اَنت۔
زوریں بیگواھیاں پاکستان ءِ تھ ءَ ایراد گروکیں تواراں دارگ ءِ یک آسراتی ءِ زانگ بیت ءُ پاکستانی چیریں گلانی سر ءَ مدام اے بھتام جنگ بیت کہ آ ابید ء تُرس ءُ بیم ءُ سرجمیں آجوئی ءَ گوں اے سلاہ ءَ کارمرز کنگ ءَ اَنت۔
بیگواھیں سندی راجداریں جھدکارانی نگیگیں جاورانی ھال روتاکانی تھ ءَ نہ بیگ ءِ ھساب ءَ کاینت، اے کسھانی سر ءَ گپ کنگ ءَ پاکستانی رسانکدر تُرس اَنت ۔ وائس فار بلوچ مسنگ پرسنز ءِ داں اسلام آباد ءَ لانگ مارچ ءُ گوستگیں یک دیھکے ءَ چہ جنزوکیں زھرشانی ءُ پشتون تحفظ موومنٹ ءِ دیم ءَ آیگ ءِ سوب ءَ بلوچ ءُ پشتون بیگواھیں راجداریں جھدکارانی ھالانی سر ءَ کدی کدی (رژنائی کپ اِیت) تران بیت۔ ایشی ءِ چپ ءَ سندی بیگواھیں مردمانی جیڑہ ءَ گوں ترندی ءَ چیر دیگ ءِ جھد کنگ بیگ ءَ اِنت۔ گوستگیں ماہ ءَ کراچی پریس کلب ءِ دیم سندی بیگواھیں راجداریں مردمانی یک کنائنگ ءِ ھاتر ءَ جنزوکیں زھرشانی بنجل ءِ سر ءَ اُرش کَنگ ءُ بنجل گوجگ بیتگ ءُ زھرشانی ءَ نشتگیں زالبولاں زور دگانی سر ءَ چِکان ءُ پولیس اولاکانی تھ ءَ مان کنگ ءَ گندگ بیتگ اَت۔
اے زوراکی پاکستانی پالیسی، زلم آماچیں راجاں گوں یک دومیگ ءَ نزیک آرگ ءَ اَنت ۔ گوستگیں روچاں سندی، پشتون، مھاجر ءُ بلوچ رھشوناں پہ جھدءَ ھواریں پتر ءِ اڈ دیگ ءِ نیمگ ءَ شانک داتگ اِش۔ انوگیں جاوارانی ھساب ءَ اے گپ ھچ گمانی نہ اَنت کہ آیوکیں روچانی تھ ءَ پاکستانی راجدری پیشوکیں نامگ ءِ سر ءَ یک مزنیں ھواریں راجداری پتر ءِ گندگ ءَ کیت۔
راجداریں گلاں چہ یک گامے دیم ءَ جُنزان ءُ سند ءُ بلوچستان ءِ آجوئی دوستیں سلاہ بندیں گلاں بلوچ سلاہ بندیں گلانی ھمسنتیں گل “براس” ءُ سندی سلاہ بندیں گل “ایس آر اے” ءِ دروشم ءَ یک ھوارکاریں پتر ءِ جوڑ کنگ ءِ جار اِش جتگ۔