لچہ: ندر پہ آسم کریم ءُ تارک کریم ءَ بیسمہ ءِ شهیدانی نامءَ
لچہ کار: آرپ وپا بلوچ
دی بلوچستان پوسٹ
جی جی آسمیں دردانگ
کندیل تارکیں تی زانگ
شیدائیں وتن دیوانگ
درّیں اشرپی ءِ چانگ
سیمیں ملپداں آتاریں
هورانی کش ءَ چوتاریں
پکر تی منزلاں بکتاریں
پل ءُ گواڈگیں تی ترانگ
شیدائیں وتن دیوانگ
وابانی شَروک مانا انت
گیڑیں بڈرهیں دریا انت
اهد ءِ سرمچنڈ مولا انت
زور ءِ سیاہ شپاں مانشانگ
شیدائیں وتن دیوانگ
سر پہ آجوئی پرداچاں
بیرانی بدل بالاچاں
تیر تئی سینگ ءَ آماچاں
پاکیڑه منی بور پانگ
شیدائیں وتن دیوانگ
هونانی تڑاں بامیناں
همبل جوزگاں گامیناں
آرپ دپتر ءَ نامیناں
سی جُزمیں زمین پروانگ
شیدائیں وتن دیوانگ