کراچی ءَ اُرش ءِ تُرس، ریڈ زون ءِ تہ ءَ ترند پھازگی بندات
دی بلوچستان پوسٹ
کراچی ءَ ریڈ زون ءَ گمانی پھازگی تُرس ءِ رد ءَ پھازگی ترند کنگ بیتگ اَنت وھدیکہ اولاکانی ءُ آیوک ءُ روکیں مردم پٹگ بیگ ءَ اَنت۔
ڈی آئی جی ساؤتھ جاوید اکبر ریاض ءِ رد ءَ جتائیں چیریں ارزانی تہ ءَ کراچی ءِ شھر ءِ ھنکین (ریڈ زون) ھاسیں پیم ءَ جتائیں ملکانی کونسل گسانی درگت ءَ پھازگی گمان پیش دارگ بیتگ، کہ آئی ءَ پد جتائیں کونسل گسانی ءُ سپارتی واکدارانی گسانی چاریں نیمگاں پھازگی ءِ تہ ءَ اناگتی گیشی آرگ بیتگ۔
ایس ایس پی ساؤتھ شیراز نذیر ءِ رد ءَ کلفٹن ءَ چینی کونسل گِس ءُ رشینّ کونسل گِس ءِ چاریں نیمگاں پھازگی پیش ءَ گیشتر ترند کنگ بیتگ اَنت۔ جاوید اکبر ریاض ءِ رد ءَ اے ھنکینانی تہ ءَ پولیس ءِ چار گیشیں موبائل(اولاک) ءُ ایشانی سر ءَ شیواریں کارمند دارگ بیتگ اَنت ءُ گیشیں ڈبہ دیگ بیتگ اَنت، وھدیکہ بکتر بند اولاک ءُ پولیس ءِ دگہ چکروکیں اولاک پیسر ءَ چہ ھمے دمگانی تہ ءَ ھست اَنت ۔
ساؤتھ زون ءِ پولیس مستر جاوید اکبر ریاض ءِ رد ءَ شھر ءِ ریڈ زون اگاں درملکی گلانی کارگسانی چاریں نیمگاں پھازگی گیش کنگ ءَ ھوار ھوار اولاکانی پٹگ ءِ یکشلی ھم بندات کنگ بیتگ وھدے پادانی آیوک ءُ روکیں مردم ھم پٹگ بیگ ءَ اَنت۔
یک جُستے ءِ پسہ ءَ ڈی آئی جی ساؤتھ ءِ گوشگ اَت کہ اے یکشلی آیوکیں لھتیں روچاں داں برجاہ بیت کنت۔
پولیس ءِ رد ءَ کراچی ءِ تہ ءَ پاکستان اسٹاک ایکسچینج ءِ سر ءَ اُرش ءَ پد سلاہ بندیں گلانی نیمگ ءَ چہ جتائیں اُرشانی شور بندی ءِ ھال دیم ءَ پیداک اَنت، وھدیکہ گیشتریں اھوالانی رسگ ءَ پد پھازگی گل سک ترند پھازگی کنگ ءَ اَنت۔