بلوچ اسٹوڈنٹس آرگنائزیشن پجار ءِ بنجاھی سیکرٹریٹ ءَ بلوچ بلوچ اسٹوڈنٹس ایکشن کمیٹی ءِ بنجاھی کارمستر ڈاکٹر نواب ءِ پاگواجھی ءَ وانندہ گلانی یک دیوانے اڈ ڈیگ بیتگ کہ ایشی ءِ تہ ءَ بی ایس او پجار، بی ایس او، پشتون اسٹوڈنٹس فیڈریشن ءِ رھشوناں بھر زرتگ۔
دیوان ءِ یک تھنائیں ایجنڈا ءِ آنلائن کلاسانی جیڑہ ءِ سر ءَ گپ ءُ تران بیتگ، وانندہ گلانی رھشوناں گوشت بزگیں اُستان بلوچستان ءَ ھم ہائیر ایجوکیشن کمیشن ءَ آنلائن کلاسانی پیسلہ زور پرمان کُتگ، کہ اود ءَ بازیں دمگانی تہ ءَ انٹرنیٹ لھتیں سوبانی بنیاد ءَ بند کنگ بیتگ ءُ آئی ءَ ھوار ھوار بلوچستان ءِ گیشتریں نودربرانی سیادی گوں انچیں کوچگی ھنداں اِنت کہ اود ءَ موبائل نِیٹورک ھم نیست اَنت۔
نودربرانی رھشوناں دیمترا گوشت کہ ھَژدھمی بدلی (اٹھارویں ترمیم) ءَ پد درستیں واک اُستانانی گور ءَ اتکگ اَنت ءُ استاناں وت پیسلہ کنگ لوٹ اِیت، شال کہ بلوچستان ءِ راجدانی اِنت آئی ءِ ھم کَش ءُ کِر ءَ انٹرنیٹ سک سُست کار کنت، ءُ نھ ءِ جنکیں نودربرانی ھاتر ءَ گامگیج ءِ ٹھینگ بیتگ ءُ دومی نیمگ ءَ پاکستان ٹیلی کام اتھارٹی ءَ وت وتی گزارش ءِ تہ ءَ ساپیں وڑے ءَ گوشتگ کہ بلوچستان ءِ ھپت دمگانی تہ ءَ انٹرنیٹ پھازگی ءِ سوب ءَ بند کنگ بیتگ اَنت ۔
وانندہ گلاں ہائیر ایجوکیشن کمیشن ءِ اے پیسلہ سرجم ءَ رد کُتگ ءُ گوشتگ کہ ایشی ءِ ھلاپ ءَ دلجمیں گامگیج ٹھینگ بیت اِنت۔
ھمے درگتا یک کمیٹی ءِ اڈ دیگ بیتگ کہ آئی ءِ رد ءَ پشتون اسٹوڈنٹس فیڈریشن ءَ چہ عالمگیر مندوخیل، نقیب کاکڑ، بلوچ اسٹوڈنٹس آزگنائزیشن پجار ءَ چہ زبیر بلوچ ، طارق بلوچ، بلوچ اسٹوڈنٹس آرگنائیزیشن ءِ شوکت نذیر بلوچ ءُ بلوچ اسٹوڈنٹس ایکشن کمیٹی ءِ نیمگ ءَ ڈاکٹر نواب بلوچ ءُ خالد بلوچ بہ اَنت، کمیٹی آنلائن کلاسانی درگتا جتائیں گامگیج اڈ دنت۔