گوادر ءَ پوجی بیڑ، دو مردم بیگواہ

سر بیتگیں ھالانی رد ءَ گوادر ءَ پاکستانی پوج ءَ بیڑ برتگ ءُ دو مردم لَٹ ءُ کُٹ کنگ ءَ پد بیگواہ کرتگ اَنت –

دی بلوچستان پوسٹ

آوار جنگ بیتگیں مردمانی پجار سئید ء ابراھیم جھمنند دشت کروس تنک ءُ اسھاک ءِ ناماناں زانگ بیتگ اَنت –

دمگی مردمانی رد ءَ ھردوکیں مردم گوادر ءَ ایدھی سینٹر ءَ کار ءَ اَنت –

آیاں گوشت کہ گوستگیں دو شپاں پاکستانی پوج گوادر ءِ جتائیں جاھاں بیڑ برگ اِنت مردماں ترس آماچ کنگ ءَ اِنت –

دمگی مردمانی رد ءَ ھردوکیں مردم پوج ءَ یک برے الکاپ ءَ جتگ ءُ ومیگ کرتگ اَنت ءُ پد ءَ ھردوک وتی گاڑی ءِ تہ ءَ چگل داتگ ءُ ناشناسیں جاھاں برتگ اَنت –

آیاں گوشت کہ آوار جنگ بیتگیں مردم گوادر ڈور گٹی ءُ پکیر کالونی ءِ میان ءَ ایدھی سینٹر ءَ بیتگ اَنت ءُ شپ ءَ پوج ءَ چُپت ءُ چِست کرتگ اَنت –

دمگی مردمانی رد ءَ پوج ءَ لوگ پہ لوگ پَٹگ ءِ پجیگ ءَ ھمے گپ ءَ ھم جنگ ءَ َانت کہ گوادر ءَ چیریں کارمندانی ھالے ردءَ اُرشکار سر بیتگ اَنت پوج ءِ گوشگ اِنت کہ مارا ھمے گمان بیگ اِنت کہ اُرشکار مئے سر ءَ اُرش کن اَنت –

زانگ بہ بیت گوادر پہ پوج ءُ سرکاری واکدارانی واستا مھرتریں جاھے زانگ بیت کہ سئیں نیمگاں بستگیں زر اِنت ءُ دومی نیمگ ءَ ھرگام ءِ سر ءَ پوجی چوکی اَنت –

زانگ بہ بیت گوستگیں سال ءَ مجید برگیڈ ءِ چار پدائی یے جنگولاں گوادر پی سی ھوٹل ءَ اُرش کرتگ اَت ءُ بیست ءُ چار اداراں داں جنگ برجاہ داشتگ اَت –

چریشی ءَ پد پوج ءُ چیریں ادارھانی واستا ترندیں جیڑہ ودی بیتگ اَت کہ اے چون ءُ چتور اتکگ ءُ گران ءُ نوکیں سلاھانی گون ءَ پوجی بنجل ءِ نزیک ءَ یک مزنیں ھوٹلے ءَ پتریتگ اَنت –