ڈنک ءُ دازن وھیل ءِ ھلاپ ءَ یونان ءَ زھرشانی

بی آر پی ءِ نیمگ ءَ یونان ءَ بیتگیں زھرشانی ءَ بی این ایم، ایف بی ایم ءُ بی ایچ آر سی ءِ باسکاں بھر زرتگ –

دی بلوچستان پوسٹ

سر بیتگیں ھالانی رد ءَ زیک 21 جون 2020 ءَ یونان ءِ بنجاھی راجدانی ایھتنز ءَ بی آر پی ءِ یونان ءِ ھنکین ءِ چیردستی ءَ پاکستانی آرمی ءُ ڈیتھ اسکواڈ ءِ دست ءَ ملک ناز ءُ بی بی کلثوم ءِ کُشگ ءِ بگیری ءَ یک زھرشانی یے برجم دارگ بیتگ، کہ اے زھرشانیءَ بی آر پی ءِ سی سی ممبر اسلم کیازی، بی این ایم ءِ یونان ھنکین ءِ آرگنائزر قدیر ساگر، ڈپٹی آرگنائزر یونس بلوچ ءُ ایف بی ایم یونان ءِ سنگت جنید بلوچ ءُ بی ایچ آر سی یونان ءِ نمائندگ ذاکر بلوچ ءَ ھوار بلوچ کمیونٹی ءُ دری راجانی مردماں بھر زرتگ۔

زھرشانی ءَ پاکستان ءِ زلم ءُ زوراکیانی ھلاپ ءَ اوگام جنگ بیتگ ءُ پاکستانی آرمی ءِ داشتگیں ڈیتھ اسکواڈ ءِ دست ءَ بلوچ نسل کشی ءِ بارو ءَ پنتاک “پمفلٹ” بھر کنگ بیتگ ۔

زھرشانی ءَ ھواریں مردماں گْوشت کہ ھمے نیام ءَ پاکستانی کمیونٹی ءِ لھتے مردماں زھرشانی ءِ دارگ ءِ جھد کتگ ءُ زھرشانیءَ ھواریں مردم بیھار داتگ اَنت کہ پاکستان ءِ ھلاپ ءَ زھرشانی مکن ات ءُ شمارا ھمد ءَ ھم ما کشت کنیں، پولیس ءَ بیھار دیوک گپتگ ءُ گوں وت برتگ اَنت –

زھرشانی کنوکیں مردماں گْوشت کہ چریشی ءَ چَہ پدر بیت بلوچ دنیاءِ کجام کنڈ ءَ بہ بیت وتی ھک ءِ توار ءِ چست کنگ ءَ ، پاکستان ءِ زور ءُ زُلم ھم آئی ءِ سر ءَ ساھیل اَنت-

آیاں گْوشت کہ آ تری یورپ ءِ ملک سوئیڈن بہ بیت ، گریس ءَ یا بلوچستان ھمک جاہ ءَ پاکستانی کارچ پہ بلوچ مھلوک ءَ تینز اِنت کہ آئی ءَ کجام ناں کجام جاہ ءَ گُٹگیر بہ کن آں –

زانگ بہ بیت گوستگیں روچ ءَ شال ءَ دازن وھیل ءِ ھلاپ ءَ ھم زھرشانی کنگ بیتگ، زھرشانی ءَ بازیں کَچے ءَ مزن نامیں راجدار ءُ چاگردی مردماں بھر زُرتگ اَت-