شال ءَ دازن وھیل ءِ ھلاپ ءَ زھرشانی

شال ءَ برمش یکجھتی کمیٹی ءِ نیمگ ءَ شال ءَ زھرشانی کنگ بیتگ –

دی بلوچستان پوسٹ

دی بلوچستان پوسٹ پتر ھال ءَ سر بیتگیں ھالانی رد ءَ شال ءَ برمش یکجھتی کمیٹی ءِ نیمگ ءَ زھرشانی روانک کَشگ بیتگ روانک شھر ءِ جتائیں جاھاں تران بیتگ ءُ دیم پہ شال ءِ پریس کلب ءَ سر بیتگ –

پریس کلب ءِ دیم ءَ روانک سر بیتگ ءُ اود ءَ بازیں کَچے ءَ مُچی ءِ دروشم ءَ مَٹ بیتگ –

روانک ءَ لس مردم، سیاسی، چاگردی، انسانی ھکانی باسکاں ھوار چُک ءُ جنیناں ھم بھر زرتگ –

روانک ءَ بھر زیروکیں مردماں بلوچستان ءِ دمگ کیچ ءِ ھنکین تمپ دازن ءَ دُز ءُ ڈنگانی دست ءَ کُشگ بیتگیں زالبول گُلسوم بلوچ ءِ کوش ءِ بگیری ءَ اوگام جتگ ءُ آئی ءِ کشندھانی دزگیر کنگ ءِ لوٹ کُرتگ –

اوگام جنوکاں گوشت کہ بلوچستان ءَ چُو بنگلہ دیش ءِ پیم ءَ السمش ءُ البدر ءِ رنگیں گل جوڑ کنگ بیتگ اَنت کہ ھمک روچ چو بنگلہ دیش ءِ وڑ ءَ اُرش کنگ ءُ بلوچ زالبولاں کُشگ ءَ اَنت –

آیاں گْوشت کہ ریاست ءِ چیردستی ءَ جوڑ کرتگیں گل ڈیتھ اسکواڈ بلوچستان ءِ کُنڈ کُنڈ ءَ شنگ اَنت ءُ بلوچ مھلوک ءِ سر ءَ زوراکی کنگ ءَ اِنت –

اوگام جنوکاں شپیک مینگل ءُ تربت ڈنک وھیل ءَ ھواریں سمیر سبزل ءِ ھلاپ ءَ اوگام جتگ ءُ سرکار ءَ چَہ لوٹ کرتگ ءُ گْوشتگ کہ اے وڑیں مردم گرگ ءُ زندانی کنگ بہ بنت –

روانک ءَ وائس فار بلوچ مسنگ پرسنز ءِ کمک سرکماش ماما کدیر، ڈاکٹر ھئی بلوچ، بی این پی مینگل ءِ بنجاھی کمیٹی ءِ باسک زاھد بلوچ، پشتون مومنٹ ءِ باسک آگا زبیر شاہ ءُ چاگردی ءُ سوشل ایکٹویسٹ ھوران بلوچ، ڈاکٹر مھرنگ بلوچ ءُ بلوچستان ءِ گوستگیں سر وزیر اسلم رائیسانی ءَ ھوار لس چاگردی ءُ سیاسی مردماں بھر زُرتگ –

مُچی ءَ تران کنان ءَ پشتون مومنٹ ءِ رھشون اگا زبیر شاہ ءَ گْوشت کہ بلوچستان ءِ ھمک جاہ ءَ بلوچ ءُ پشتوناں ریاست ءِ نیمگ ءَ جوڑ کرتگیں گل تالبان ءُ ڈیتھ اسکواڈ ءِ کارمند شھید کنگ ءَ اَنت –

آئی ءَ گْوشت کہ بلوچ ءُ پشتون ریاست ءِ بھر نہ اِنت کہ ھمے واستا بلوچ ءُ پشتونانی سر ءَ زلم ءِ کھر کپگ ءَ اَنت ءُ بلوچ ءُ پشتونانی اِزت ءُ نپس ءَ لُٹگ ءَ اِنت –

آئی ءَ گْوشت کہ اے پہ بلوچاں یک “چیلنجے ءِ دروشم ءَ پیداک اِنت کہ ریاست ءَ بنگلہ دیش ءِ پیم ءَ کرتگ ءُ ھما وڑ کنگ ءَ اِنت –

بی این پی ءِ رھشون زاھد بلوچ ءَ گْوشت کہ بلوچ ءُ پشتونانی کُشگ ءَ ریاست ءَ یک شوربندی ءِ کرتگ ءُ بلوچانی زالبولاں کُشگ اِنت ءُ پاکستان وتی آمدگسانی سر ءَ اوست نہ داریت ءُ بلوچ ھزاراں بلوچانی وریایے بچاں بیگواہ کنگ ءُ آیاں آمدگساں پیش کنگ ءَ نہ اِنت –

آئی ءَ گْوشت کہ ما بنجاھی پتر ءِ سرکار ءَ چَہ بیگواھیں بلوچ ءُ بلوچستان ءِ ناوشیں جاورانی مدام باوست کرتگ بلے تنی وھدی بنجاھی سرکار وتی مساماں سوبمند نہ بوتگ کہ آئی ءَ بس مئے گپ ایش کرتگ ءُ دومی گوش ءَ کَش اِتگ اَنت –

آئی ءَ گْوشت کہ پاکستان بلوچاں بھتام جنت کہ بلوچ سلاہ چِست کن اَنت جنگول اَنت آئی ءَ گْوشت کہ بلوچاں وتی ننگ ءُ ناموس ءِ رکینگ ءِ واستا وتی سر بباہ داتگ اَنت –

مچی ءَ ڈاکٹر مھرنگ بلوچ ءَ گْوشت کہ گوستگیں روچاں تربت ڈنک ءَ ملناز شھید کنگ ءُ آئی ءِ زھگ برمش زدگ بیتگ مھرنگ بلوچ ءَ گْوشت کہ تنی وھدی برمش ءِ ٹپ وش نہ بیتگ ءُ ملناز ءِ کبر ءِ ھاک ھُشک نہ بیتگ اَنت ءُ ھمے وڑی ءَ تمپ دازن ءَ دُزاں کلسوم ءِ لوگ ءَ دور کرتگ ءُ آ چُکانی دیم ءَ کُشتگ –

آئی ءَ گْوشت کہ اے ٹولی یک دیھکے ءَ چَہ مئے کُشت ءُ کوش ءَ کنگ ءَ اِنت ءُ ھمے وڑ ءَ توتک ءَ ھمے ٹولی ءِ بنجل ءَ یک دراجیں گورے دزکپتگ کہ اود ءَ بازیں کساسے ءَ مردمانی جون بیتگ اَنت –

آئی ءَ گْوشت کہ بلوچستان ءِ ھمک سیاسی ءُ لس بیگواھیں مردمانی مردم ھمے جیڑگانی تہ ءَ اَنت کہ بیت کنت اے دزکپتگیں ھڈ مئے مردمانی بہ بنت –

زھرشانی ءَ ھسان کمبرانی ءِ گوھار ءِ ھسبیہ کمبرانی ءَ ھم بھر زرتگ ءُ آئی ءَ گْوشت کہ ما آمدگساں چَہ بے اُمیت بیتگ ءُ دگانی سر ءَ توار جنگ ءَ اِنت بلے ریاست مئے تواراں ھِچ وڑ ءَ گوشدارگ ءَ نہ اِنت –

ھسیبہ کمبرانی جھانی انسانی ھکانی گلاں چَہ لوٹ کرت ءُ گْوشت کہ آ مئے تواراں دلگوش بہ کنت ءُ مئے سر ءَ بیوکیں زُلمانی سر ءَ گامگیج بہ زور اِیت –

مُچی ءَ کماشیں رھشون ڈاکٹر ھئی بلوچ ءَ تران کنان ءَ گْوشت کہ مروچی ما اے مُچی ءَ یکجاہ اِنت اے گوستگیں ھپتاد سالاں چَہ بلوچانی سر ءَ بیوکیں زُلمانی آس اِنت کہ مارا دگانی سر ءَ اوشتارینگ ءَ اِنت –

آئی ءَ گْوشت کہ ھما بلوچ وتی ڈیھ ءِ سر ءَ مرگ ءَ تیار اِنت گڑا آئی ءَ ھچ زور پروش دات نہ کنت –

آئی ءَ گْوشت کہ ھکمران یکوے بلوچاں لگت دیگ ءُ کُشگ ءَ اَنت بلے آ بلوچانی شریں زندگی ءِ لوٹوک نہ اِنت ءُ آئی ءَ گْوشت کہ ریاست ءَ گوست چارگی اِنت کہ آئی ءَ زیردستیں مردمانی سر ءَ زُلم بندات کرتگ ءُ مروچی آ چَہ ریاست ءِ دست ءَ چَہ لگوشتگ ءُ شتگ اَنت –

آئی ءَ گْوشت کہ اے پانزدہ سالانی تہ ءَ ریاست جتا جتائیں رنگ ءُ پیماں کاربندگ ءَ اِنت ءُ بلوچستان ءِ دمک ءُ در ھونی یے جاورے ءَ دور داتگ اَنت –

ڈاکٹر ھئی بلوچ ءَ گْوشت کہ نوزدہ سد ءُ چِل ءُ ھشت ءَ بہ گر داں ھپتاد ءُ ھپت ءِ میان ءَ ریاست ءَ بلوچ ءِ راجداری ءِ پتر ءَ ھونریچیں دروشم کرتگ اَنت ءُ پد ءَ اے ھمک دیھک ءَ نوک بیان اَنت ءُ گیشتر ودان اَنت –

آئی ءَ گْوشت کہ بلوچ راج ءَ بلوچ سرڈگار ءِ سر ءَ کمتر پیش دارگ ءُ بلوچانی وانندگیں مردماں گار ءُ بیگواہ کنگ ءُ اشانی ھمراھی ءَ بلوچانی ورنائیں بچاں منشیات ءِ تہ ءَ پِرینگ ءُ آئی ءِ راجی سِنچ ءَ پچرگ ءَ اِنت –

آئی ءَ گْوشت کہ بلوچ، سندھی، پشتون ءُ سرائیکیاں ریاست لگت دیگ ءُ کُشگ اِنت آئی ءَ گْوشت کہ اے سرزمین ءِ واھند بلوچ اَنت بلوچ بنت –

مچی ءَ تران کنان ءَ نواب اسلم رئیسانی ءَ گْوشت کہ ریاست ءِ پُشت ءُ پناھی ءَ جوڑ کرتگیں ڈیتھ اسکواڈ بلوچاں کُشگ ءُ اشانی ھمراھی ءَ لوگاں دور کنگ ءُ بلوچ زالبولاں کُشگ ءَ اَنت –

آئی ءَ گْوشت کہ بلوچ چاگرد ءَ ھمے گْوشگ ءَ اَنت کہ بلوچ وت ما وت اڑیتگ اَنت آئی ءَ گْوشت کہ اے درستیں اڑ ءُ کُڑانی پُشت ءَ ریاستی ادارہ اَنت کہ بلوچانی میڑنگ ءَ چِست اَنت ءُ آئی ءَ گْوشت کہ ھرکس وتی ھک ءِ گپ ءَ جنت آئی ءَ ریاستی ادارہ گار ءُ بیگواہ کنگ ءَ اَنت –

مچی ءَ تران کنان ءَ ماما قدیر بلوچ ءَ گْوشت کہ اے دَہ لکیں پوج برمش ءِ وڑیں کسانیں چُکاں چَہ ترس آماچ بیتگ ءُ لوگانی تہ ءَ اُرش کنگ ءَ اِنت –

زانگ بہ بیت پانزدہ جون تمپ دازن ءَ دُزاں یک لوگے ءَ دور کرتگ ءُ اود ءَ گلسوم نامے زالبولے ءِ گُٹ کارچ ءِ سر ءَ بریتگ ءُ سھر دُزیتگ اَنت چریشی ءَ پیسر تربت ڈنک ءَ ڈیتھ اسکواڈ ءِ کارندھاں یک لوگے ءَ دور کرتگ ءُ اود ءَ ملکناز تیرانی آماچ کرتگ ءُ کُشتگ ءُ آئی ءِ زھگ برمش زدگ کرتگ –

چرے وھیلاں پد بلوچستان ءَ ھوار درملکاں نیشتگیں بلوچانی نیمگ ءَ یکشل ءَ زھرشانی بیگ ءَ اَنت –