بلوچ زالبول ءِ کوش ءَ ھواریں ریاستی ڈیتھ اسکواڈ ءِکارندہ کُشتگ- بی آر اے

زبیر، بلوچ جھدکارانی شھیدی، پنجگور ءُ کَش ءُ گوری دمگاں دُزی ڈنگیاں ھوار بیتگ- بیبگر بلوچ

دی بلوچستان پوسٹ

بلوچ ریپبلکن آرمی ءِ جارکش بیبگر بلوچ ءَ رسانکدراں شنگ کرتگیں درشان ءَ گْوشتگ کہ مروچی پنجگور ءَ ریاستی کشندہ ٹولی ءِ کارندہ زبیر ءِ کوش ءِ زمہ واری منّ اِتگ ءُ گوشتگ کہ زبیر ءُ آئی ءِ برات اُمر کہ ریاستی سلاہ بندیں کارمند اَنت ھردوک ھوار بیتگ اَنت ءُ گوستگیں سال ءَ پنجگور گرمکان ءَ بلوچ زالبول راج گُل ء پسند جھمنند زامران شھید کرتگ –

جارکش ءَ گْوشت کہ زبیر گوستگیں چار سالاں بلوچ جھد ءِ آجوئی ءِ ھلاپ ءَ ترند بیتگ ءُ چریشی ءِ پشدر ءَ ایم آئی اے ءِ کارندھاں آ پروم ءُ پنجگور ءَ دزی ءُ ڈنگی ءِ سرجمیں واک داتگ اَنت چریشی ءِ سوب ءَ دمگ ءِ سرجمیں نیزگاریں مھلوک وشیں زندگی ءَ زبھر بیتگ اَنت –

آئی ءَ گْوشت کہ بلوچ زھگ راج گُل ءِ شھید کنگ ءَ پولیس ءَ زبیر ءِ برات اُمر دزگیر کرتگ بلے ایم آئی ءِ آپسر ناسر الی زبیر ءِ ھمراھی ءَ ھوار بیتگ ءُ کشندہ اُمر ءِ رکینگ ءِ جھد ءَ بیتگ اَنت -کُشتگیں راج گل ءِ کھول چیریں ادارھاں ترس ءُ بیھار داتگ اَنت کہ اے کوش ءِ سوب ءَ آمدگسی کاروائیاں چہ دور بہ بنت پرچاکہ پولیس ءِ رپورٹانی رد ءَ آمدگسی کاروائیانی رد ءَ کشندہ اُمر ءَ پاھو دیگے پرمان کنگ بیتگ اَت –

ھمے وڑ ءَ ما انسانی ھکانی ادارھاں گوں دزبندی کن ایں کہ راج بی بی ءِ دومی کشندہ اُمر ھان ءِ رکینگ ءِ چِست ءُ ایرکنوکیں ریاستی ادارھانی ھلاپ ءَ گامگیج بہ زور اِیت –

جارکش ءَ گْوشت کہ ریاستی کشندہ ٹولی ءِ ھلاپ ءَ مئے کاروائی ترندتر بنت، ءُ بلوچ مھلوک ءَ گوں دزبندی کن ایں کہ اشانی گور ءُ نزیکاں دور بہ بنت ءُ مئے کاروائی آجو بلوچستان ءِ راہ ءُ رھبندانی رد ءَ برجاہ بنت۔