شئر: سنج زھیری کلبر
شائر: عارف وپا بلوچ
دی بلوچستان پوسٹ
سنج زهیری کلبر ڈاک انت
پما جنّت ماتیں هاک انت
گویاک گویاک مئے گویاک انت
مئے کہ ایمان یکیں دانک انت
کوَش ءِ وشبو هون رگانی
پما تلائیں یات دگانی
ارواه گرنچیں تی کہ گوانک انت
پما جنّت ماتیں هاک انت
پازل استین گرکی تلانی
آ تی گلام ءُ شیر یلانی
نام ءُ توار ءُ برزیں پانک انت
پما جنّت ماتیں هاک انت
شنز ملاریں دشت ءِ کهچر
تران کن انتیں مسکیں راهسر
هاک ءُ پلکاں سجده پاک انت
پما جنّت ماتیں هاک انت
گرند شدنت انت تراداں ڈناں
نال مزاری کاداں ڈناں
بور هزاری گیگ ءُ واک اِنت
پما جنّت ماتیں هاک اِنت
بودیگ شیراز واب ءُ شبیناں
ماهیں سدو ءِ داب ءُ کهیباں
جیگ ءِ جالار پلیں تاک انت
پما جنّت ماتیں هاک انت
آرپ شئے ءِ مست ءُ گنوکے
شیریں مهکان پہ تو هدوکے
زرد ءِ کرآن ءِ پاکیں تاک انت
پما جنّت ماتیں هاک انت