کیچ ءِ دمگ گومازی ءَ سرکاری جنکیں ہائی اسکول ءِ نوکیں اسکول بس ءِ برگ ءِ ھلاپ ءَ نودربراں اسکول ءِ دیم ءَ زھرشانی کتگ۔
زھرشانی ءِ وھد ءَ نودربراں پلے کارڈ دست ءَ داشتگ اَنت کہ آھانی سر ءَ اسکول ءِ بس ءَ واتر کنگ ءِ لوٹ نبشتہ بوتگ انت۔
اے موہ ءِ سر ءَ نودربراں گوشتگ کہ گورنمنٹ گرلز ہائی اسکول گومازی ءِ اے بس گومازی، ملانٹ ءُ کش ءُ گور ءِ دمگاں چہ وانگ ءَ آیوکیں نودربرانی واستا مزنیں آسراتی یے بوتگ۔ بلے رنجیگیں گپ ایش انت کہ نودربر اولی رند ءَ اے بس ءَ سفر ھم نہ کتگ اکہ ضلع سوراب ءِ دمگ گدر ءِ نزیک ءَ ناشناسیں سلاہ بندیں مردماں بس گوں وت برتگ۔
نودربراں بس ءِ بروکاں دزبندی کتگ کہ آ وتی وانگ ءُ زانگ ءِ جیڑھ ءُ جنجالاں سرپد بوھگ ءَ پد زوت اسکول بس ءَ واتر بہ کن اَنت دانکہ آھانی دیم ءَ اتکگیں سفری جیڑھ ھلاس کنگ بہ بنت ءُ آ لا گاڑیانی گرانیں کرایہ ءِ دیگ ءَ ھم چہ رکّگ بہ بنت۔
نودربراں اے ھم لوٹ کتگ کہ وتی وانگ ءُ زانگ ءِ لوٹاں ھیال ءَ دارگ ءَ زوتاں چہ زوت اسکول بس الکاپی ءَ واتر کنگ ءِ ھاترا سیادی داروکیں واکدارانی نیمگ ءَ گامگیج چست کنگ بہ بنت۔