بلوچستان ءِ جتاجتائیں دمگ کیچ، شال ءُ آواران ءَ 30 مردم زورانسری آوار جنی ءِ نشانگ کنگ بیتگ اَنت-
گیشیں ھالانی رِد ءَ کیچ ءِ دمگ بلیدہ ءَ پاکستانی پوج ءَ بیڑبرتگ پنچ مردم آوار جتگ ءُ بیگواہ کتگ اَنت-
اِھوالکار ءِ رِد ءَ پنچیں مردم بلیدہ ءِ دمگ بٹ ءِ جھمنند اَنت ءُ یکیں کھول ءَ چہ سیادی دار اَنت-
دمگی مردمانی رِد ءَ گوستگیں شپ ءَ پاکستانی پوج ءُ چیریں ادارھانی کارندھاں آیانی لوگانی سر ءَ بیڑبرتگ – اے میان ءَ کھول مردمانی سر ءَ لَٹ ءُ کُٹانی نشانگ کنگ ءَ پد پنچیں ورنا آوار جتگ ءُ ناشناسیں جاھے ءَ برتگ اَنت-
بیگواہ کنگ بیتگیں ورنایانی پجّار یونس خالق ء عبدالخالق، محبوب بلوچ ء عبدال، مجاھد بلوچ ء لالا حسن، عبدالرحیم ء عبدالواحد ءُ بالاچ خان ء محمد نام ءَ چہ بیتگ اَنت-
اشی ءَ اَبید گوستگیں ھپتگ ءَ کیچ ءِ دمگ کولواہ ءِ جتاجتائیں ھندانی سر ءَ یک لشکر کشی ءِ میان ءَ پاکستانی پوج ءَ درزنانی مردم آوار جتگ ءُ بیگواہ کتگ اَنت کہ اشانی تہ ءَ 21 مردمانی پجّار بیتگ اَنت-
پجّار بیتگیں مردمانی تہ ءَ شارپو ء کریم بخش، کریم بخش ء مقصود ، اکبر ء غمگین ،موسیٰ ء قادر بخش ،صالح ء قادر بخش ،وزیر احمد ء نور محمد ،نور محمد ء شکر ،بلال ء نیک سال، بشام ء نیک سال، رضی ء یوسف، ھن محمد، نواب، آمد علی ء باھوٹ، کریم احمد ء وزیر احمد، اسماعیل ء نور محمد، مھدی کریم ء اللہ داد، شھزاد ء پاندو، مبارک ء غازی، وھاب ء مبارک زریپ ء ابدال تیپ ءُ ساجد ء نبی بخش ھوار اَنت-
ھمے وڑ چہ شال ءِ دمگ ایسٹرن بائی پاس ءِ جھمنندیں 20 سالی ئیں نودربر کفایت بلوچ ء ھدایت اللہ بنگلزئی 18 ستمبر 2026 ءَ شپ ءِ کساس نُھ ءَ یونیورسٹی آف بلوچستان ءِ دیم ءَ چہ آوار جتگ ءُ بیگواہ کتگ – سربیتگیں ھالانی رِد ءَ اشی ءِ زورانسری آوار جنی ءَ کاؤنٹر ٹیررازم ڈیپارنمنٹ (سی ٹی ڈی) کارندہ ھوار اَنت-
دومی نیمگ ءَ آواران ءِ دمگ جھاؤ ءَ پاکستانی پوج ءَ پت ءُ چُکاں ھوار سے مردم آوار جتگ ءُ بیگواہ کتگ اَنت-
گیشیں ھالانی رِد ءَ یک نومبر 2026 ءَ پاکستانی پوج ءَ بیڑ ءِ میان ءَ مولابخش ء داؤد ءُ آئی ءِ چُک غفار ء مولا بخش آوار جتگ ءُ ناشناسیں جاھے ءَ برتگ-
دمگی اِھوالکار ءِ رِد ءَ گوستگیں روچ ءَ پاکستانی پوج ءَ دمگ ءَ بیڑبرےگ دوست محمد ء احمد سک لَٹ ءُ کُٹانی نشانگ کنگ ءَ پد آوار جتگ ءُ بیگواہ کتگ-
زانگ بہ بیت بلوچستان ءِ جتاجتائیں دمگاں ھمکروچ ءَ زورانسری آوار جنی ءِ ھال دیم کاینت-