بلوچستان ءِ تیابدپی شھر پسنی ءَ گوستگیں شپ ءَ لیفٹیننٹ کرنل ءِ رینک ءِ کوسٹ گارڈ ءِ افسر ءِ گاڑی ءِ سر ءَ تراکے بوتگ کہ ایشی ءَ پد مزنیں تیرگواری ءِ توار بوتگ۔
انگت ءَ چہ واکداراں جانی تاوانانی بابت ءَ ھچ وڑیں ھال ءُ اھوال شنگ نہ بوتگ۔
دمگی مردمانی گشگ ءِ رد ءَ تراک ءَ پد تراک ءِ جاہ بند کنگ بوتگ ءُ ھمے وھد ءَ فورسز ءَ کاروباری مراگش ھم بند کتگ اَنت۔ شھر ءِ تہ ءَ ٹرانسپورٹ ہم بند کنگ بوتگ انت۔
زانگ بہ بیت کہ ایشی ءَ چہ پیسر 18 اکتوبر ءَ پسنی ءَ اُرشے ءَ پاکستانی لشکر ءِ میجر وجاھت ءَ ھوار 7 کارندہ بیران بوتگ ۔ ارش ءِزمہ واری بلوچ لبریشن آرمی ءَ من اتگ ات۔
بلے انگت ءَ ھچ سلاہ بندیں گل ءَ گوستگیں شپ ءَ بوتگیں تراک ءِ زمہ واری نہ زرتگ۔
زانگ بہ بیت بلوچستان ءَ مُدام پاکستانی لشکر ءُ سرکاری مال ءُ مڈّیانی سر ءَ اُرشانی ھال دیم ءَ آیگ ءَ اَنت .