گل شاہ محمد حسنی ءُ ظہور شاہ شےزی ءِ یل بیگ ءِ ھال راست کنگ بیتگ۔
بلوچستان ءِ دمگ چہ چاگی ءَ آوار جنگ بوتگیں ایڈیشنل ایس ایچ او گل شاہ محمد حسنی ءُ قبائلی سروک ظہور شاہ شےزی یل کنگ بوتگ انت۔
دمگی مردمانی رد ءَ ایڈیشنل ایس ایچ او گل شاہ محمد حسنی گوستگیں ماہ 19 ستمبر ءَ ناشناسیں سلاہ بندیں مردماں چہ چاگی ءَ آوار جتگ ات ءُ ٹکی سروک ظھور شاہ شے زی آوار جتگیناں ھوار بیتگ۔
زانگ بہ بیت کہ بلوچستان سرکار ءَ پولیس ءُ سول ایڈمنسٹریشن ءِ کارندہاں ھوار سرکاری کارندہانی آوار جنگ ءِ تہ ءَ گیشی اتکگ۔
اے سال ءَ بلوچستان ءِ جتاجتائیں دمگاں چہ ڈپٹی کمشنر، ایڈیشنل جج، پولیس افسر ءُ اگدہ داراں ہوار قبائلی سروک آوار جنگ ءِ وئیل بوتگ انت۔
گوستگیں روچ ءَ سلاہ بندیں مردماں مستونگ ءِ نزیک ءَ مسافر وین ءَ چہ کلات ریکروٹ ٹریننگ سینٹر ءَ چہ 20 پولیس ٹرینی آوار جتگ کہ آ وتی لوگ ءَ روگ ءَ بوتگ انت۔
ایشی ءَ چہ دو روچ پیسر رخشان ڈویژن کمشنر اسد اللہ کاکڑ ھم چہ خاران ءَ آوار جنگ بیتگ ءُ انگت ءَ یل کنگ نہ بوتگ۔