اسکول ءِ استاد گوستگیں روچ ءَ پاکستانی لشکر ءِ کمک ءَ جوڑ بیتگیں گل ڈیتھ اسکواڈ ءِ کارندھاں کھول ءِ دیم ءَ آوار جنگ ءَ پد کشتگ۔
پسنی ءِ کشگ بوتگیں اسکول ءِ استاد پرویز مزار ءِ کھول، زھگ ءُ دمگی مردماں پریس کلب ءِ دیم ءَ زھرشانی کتگ ءُ لوٹ کتگ کہ ایپ آئی آر ءِ تہ ءَ نام گپتگیں ملزم کہ اے وھد ءَ پاکستانی لشکر ءِ پناہ گاہ ءَ اَنت زوت پولیس ءِ دست ءَ دیگ بہ بنت۔
زھرشانی کنوکاں بیھاری درشم ءَ گشتگ کہ اگاں انساپ دیگ نہ بوت گڑا ما پسنی زیرو پوائنٹ ءَ دھرنا کن ایں ءُ وئیل ءِ ھلاپ ءَ دگ ءَ بند کن ایں ۔
زانگ بہ بیت کہ کُشگ بوتگیں پرویز مزار پیشہ ءِ رد ءَ اسکول ءِ استاد بوتگ کہ گوستگیں روچ ءَ آوار جنگ ءَ پد کُشگ بوتگ۔ کھول ءِ رد ءَ پرویز مزار پرائیویٹ ٹارچر سیل ءَ دارگ ءَ پد کشگ بوتگ۔
زھرشانی کنوکاں گْوشتگ: ایپ آئی آر ءِ تہ ءَ نام گپتگیں ملزماں پناہ دیگ ءِ بدل ءَ پاکستانی لشکر ملزماں پولیس ءِ دست ءَ بہ دنت دانکہ جرمکار دزگیر کنگ بہ بنت ءُ انساپ بہ بیت۔
زھرشانی کنوکاں گْوشتگ کہ ملک ءِ ادارگ ءُ لشکر اے وڑیں کشوک ءُ شدت پسندیں ٹولیاں چہ وتی بُن ءَ در بہ کن اَنت کہ آ ادارہ ءُ لشکر ءِ نام ءَ کارمرز کن اَنت ءُ آوار جن اَنت، ٹارچر کن اَنت ءُ پد ءَ بے رھمی ءَ کُش اَنت ءُ ویرانیں جاھاں چگل دے اَنت۔
زالبولاں زھرشانی ءَ گوں تران کنان ءَ گْوشتگ کہ ”ڈیتھ اسکواڈ“ ءِ وڑیں ٹولی چہ لس مھلوک ءِ دل ءَ پہ زور ءُ ادارھاں نپرت پیداک کنگ ءَ اَنت کہ ایشی ءَ را زوت بند کنگ بہ بیت۔
کُشگ بوتگیں وانگجاہ ءِ استاد پرویز مزار ءِ چُکاں چہ پولیس ءِ بُرزتریں واکداراں دزبندی کتگ کہ آھاں انساپ بہ دنت ءُ آھانی پت ءِ کوشاں دزگیر بہ کنت۔
دومی نیمگ ءَ بیران بوتگیں مردمانی کھول ءَ پدّریں بیھار داتگ ءُ گْوشتگ: اگاں پوجانی پناہ گِریں ملزم پولیس ءِ دست ءَ دیگ مہ بنت گڑا آ پسنی زیرو پوائنٹ ءَ مکران کوسٹل ھائی وے ءَ بند کن اَنت۔
زھرشانی کنوکاں اے گپ پدر کتگ کہ بیران بوتگیں مردم بے گناھیں اسکول ءِ استادے ءُ آئی ءِ کوش ءِ تہ ءَ ھواریں مردمانی انساپ ءِ دیم ءَ آرگ ءَ انساپ ءِ زمانت دیگ بہ بیت۔