ڈاکٹر حکیم لھڑی : یک اھدے وتی آسر ءَ سر بیتگ۔ٹی بی پی شونگال

ڈاکٹر حکیم لھڑی : یک اھدے وتی آسر ءَ سر بیتگ

ٹی بی پی شونگال

نامداریں بلوچ راجدوستیں رھشون ڈاکٹر حکیم لھڑی 7اکتوبر ءَ کراچی ءَ بیران بیتگ۔ آئی ءِ ایوک ءَ یک سیاسی رھشونے ءِ جتائی نہ انت بلکیں بلوچ راجدوستی سیاست ءِ یک اھدے ءِ آسر انت کہ ایشی ءِ بنھشت زانشتی بندوکی ، سیاسی مھکمی ، راجی ھکانی واستا جد ءُ جھد ءُ مشکلیں جاوراں وتی لیکہ ءِ سر ءَ اوشتگ ءِ ھاٹیگے بیتگ۔ ڈاکٹر حکیم لھڑی ھما سیاسی دھشداں ھوار بیتگ کہ آیاں وتی ورنائی ءَ بہ گر داں گڈی ساہ ءَ بلوچ راجدوستی سیاست ءَ گوں بندوکی ءُ وتی سرجمیں زند بلوچ راج ءِ نام ءَ کتگ۔

ڈاکٹر حکیم لھڑی ءِ لَڑ ھما بلوچ راجدوستیں سیاست ءِ ھما پدریچ ءَ انت کہ آیاں سیاست ایوک ءَ واکداری رھبند یا یک وھدے ءِ سیاست ءِ لوٹانی درچ سرپد بیتگ انت بلکیں ھما راجی پجار ، سیاسی زانشت ، مچانکی ھک ءُ راج ءِ باندات ءِ جد ءُ جھد ءَ گوں بندوک انت ۔ آئی ءِ واستا بلوچ سیاست یک ازاروکی پرکاری یے نہ بیتگ ،سرجمیں زند ءِ اھدے بیتگ ۔ ھمے سبب بیتگ سیاسی جاورھالانی مٹی اتکگ انت ، زرمبشت ءَ جتا جتائیں وھداں جیڑھانی دیمپانی بیتگ ، سیاسی تاکت ءِ پرشت ءُ پروشی بیتگ ءُ جد ءُ جھد ءِ راہ ءَ اڑانک بیتگ انت، بلے ڈاکٹر حکیم لھڑی سیاست ءَ دزکش نہ بیتگ۔

آ ھما نسل ءِ نمائندگ سیاسی باسک ءُ رھشون بیتگ کہ آیاں بلوچ راجدوستی ءِ سیاست گوستانک ءِ جتا جتائیں وھداں دیستگ۔ آئی ءَ ریاستی زوراکی ، فوجی آپریشن ، سیاسی باسکانی دزگیری ، زندانی کسہ ، زورانسری بیگواھی ءُ نامداریں سیاسی مردمان کوش ءِ وڑیں دردناکیں جاور دیستگ انت ۔ آئی ءَ وتی ھمراہ سیاسی جد ءُ جھد پژدر ءَ جیڑھانی دیمپانی ءَ دیستگ انت، وتی ھمر دروریں سیاستدانانی جتا جتائیں جاور گوزگ ءَ دیستگ انت ءُ میان ءَ ودی بیتگیں جھل ءُ برزی نزیک ءَ دیستگ انت ۔ اے وئیل ایوک ءَ آئی ءِ پژدر ءِ یاتگاری ءِ بھر نہ انت بلکیں اے گوستانکی راجدپتر ءَ زانشتکاری بیتگ چریشی ءَ آئی ءِ نسل گوستگ ءُ ھرکس ءَ بلوچ راجدوستی ءِ سیاست ءِ پتر ، تب ءُ کرد جھلانکی ءِ سان ودی کتگ۔

آئی ءِ کرد ایوک ءَ اے گپ ءَ نہ بیتگ نہ بیتگ آ بلوچ راجدوستی سیاست ءَ یک نامداریں نامے ، بلکیں ایشی ءَ ھم بیتگ کہ آ دراج کشیں سیاسی اھد ءِ چمدیستگینے بیتگ۔ آئی ءِ گور ءَ سیاست ءِ یاتگاری ، زانشت ءُ لیکہ جاڑیگ بیتگ انت کہ چریشی ءَ نسل سانمند کتگ انت۔ اے دابیں مردم کجام ھم سیاسی زرمبشت ءِ واستا راجدپتری چراگے ءِ بستار ءَ زانگ بنت ، پرچاکہ آئی ءِ زندمان زرمبشت ءِ جتا جتائیں وھداں ، آئی ءِ سوبمندی ، آئی ءِ بے سوبی ، آئی ءِ بگیرداری ، آئی ءِ دیمھونی یکے دومی ءَ گوں بندوک انت ۔ وھدیکہ اے دابیں مردم اَچ دنیا ءَ رُکست بنت گڑا یک مردمے ءِ کمی سما نہ بیت انت بلکیں زرمبشت وتی یک ھنچیں چمدیستگیں مردمے ءَ زبھر بیت انت کہ آئی ءَ گوستانک نزیک ءَ دیستگ ءُ آئی ءِ جتا جتائیں وھداں وتی کرد پیلو کتگ۔

ڈاکٹر حکیم لھڑی مئے میان ءَ جاڑیگ نہ انت بلے آئی ءِ زندمان ءُ سیاسی بندوکی بلوچ راجدوستی ءِ گوستانک ءِ بھر بنت ۔ آئی ءِ نام ءِ ھما نسل ءِ درگت ءَ یاد کنگ بیت انت کہ آیاں مشکلیں وھداں وتی سیاست برجاہ داشتگ ءُ راجی ھکانی جد ءُ جھد ءَ دزکش بیگ ءَ ابید گڈی وھد ءَ داں بندوک بیتگ انت۔ آئی ءِ بیرانی یک اھدے ءِ آسر انت بلے آئی ءِ اھد ءِ سیاسی یاتگاری ءُ راجدپتر ءَ آیوکیں وھد ءِ واستا بلوچ سیاست ءِ ٹپاسگ ءِ بھر بنت ۔