بلوچستان : جتاجتائیں دمگاں باپاری گاڑیانی ءُ پاکستانی پوج ءِ سر ءَ اُرش ناکہ بندی کنگ بیتگ

بلوچستان ءِ جتاجتائیں دمگ کیچ، دالبندین، بسیمہ ءَ باپاری گاڑی ءُ پوج ءِ سر ءَ اُرش ءِ ھمراھی ءَ ناکہ بندی ھم کنگ بیتگ-

گیشیں ھالانی رِد ءَ کیچ ءِ تھسیل تمپ ءَ چہ دزکپتگیں ھالانی رِد ءَ ناشناسیں موٹر سائیکل سواروں سلاہ بندیں مردماں سمینٹ ءَ چہ پُریں مزنیں ٹرک گاڑیانی سر ءَ تیرگواری کنگ ءَ پد مانداشتگ اَنت-

اُرش ءَ ٹرک سرجمی ءَ تباہ بیتگ، بلے اُرشکاراں گاڑی ءِ ڈرائیور ءُ آ دگہ مردم یل داتگ اَنت-

ھمے وڑ دالبندین ءَ مروچی بلوچ آجوئی لوٹوکیں سلاہ بنداں دالبندین، لاگ آپ ءِ ھند سر ءَ شال تفتان باپاری شھدگ سر ءَ بازیں کلاکاں تاں ناکہ بندی کتگ پٹ ءُ پول کتگ اَنت گاڑی-

دومی نیمگ کیچ ءِ ھند گورکوپ گوستگیں روچ ءَ پاکستانی پوج ءَ پھاز دیوکیں کارندہ سلاہ بندیں مردماں اُرش ءِ نشانگ کتگ اَنت ءُ بسیمہ ءِ ھند کلغلی ءَ پاکستانی پوج ءِ پوسٹ سر ءَ ساڑی کارندہ اسنائپر اُرش ءِ نشانگ کنگ بیتگ-

اُرشاں چہ جانی تاوان ءِ گمان اِنت وئیلانی زمہ واری انگت ھچ گل ءَ نہ زرتگ اَنت-