بلوچستان ءِ جتاجتائیں دمگاں بیتگیں وئیلانی زمہ واری یو بی اے ءُ بی آر اے ءَ منّ اِتگ اَنت

بلوچستان ءِ جتاجتائیں دمگ ناکہ بندی ءُ گیس پائپ لائنانی سر ءَ بیتگیں وئیلانی زمہ واری بی آر اے ءُ یو بی اے ءَ منّ اِتگ اَنت-

یونائیٹڈ بلوچ آرمی ءِ جارکش مزار بلوچ ءَ رسانکدر ءَ شنگ کتگیں درشان ءِ تہ ءَ گوشتگ کہ یو بی اے ءِ سرمچاراں گوستگیں بیگاہ ءِ شش ءَ بولان ءَ شال سبی راجی شھدگ این – 65 کڑتگ سیاہ پشت ھند سر ءَ ناکہ بندی برجاہ داشتگ-

جارکش ءَ گوشتگ اے میان ءَ کساس گنٹایے نیم ءَ پٹ ءُ پول برجاہ داشتگ اے میان ءَ گوزوکیں گاڑی ءُ مردم جُست ءُ پُرس ءِ ھمراھی ءَ دمگ ءَ رؤک ءُ آؤکانی سر ءَ نگاہ داشتگ-

جارکش ءَ گوشتگ اے گامگیج ءِ مول ءُ مراد زورگریں پوج ءُ شکی ئیں مردمانی پُرکاری ءِ سر ءَ نگاہ ایر کنگ ءُ دُژمن ءِ سُر ءُ پُرانی دارگ بیتگ-

آئی ءَ گوشتگ کہ ناکہ بندی ءِ میان ءَ مئے سرمچاراں شھدگ ءَ چہ گوزوکیں مردماں چہ زرورتیں جُست ءُ پُرس کتگ وھدے کہ شکی ئیں سرپد بیتگیں مردمانی گاڑیانی پٹ ءُ پول ھم برجاہ داشتگ اے میان ءُ شھدگ سر ءَ رؤک ءُ آؤک دمگ چارتگ اَنت-

جارکش ءَ گوشتگ اے وئیل زمہ واری ءَ مئے گل منّ اِیت اے وڑیں کاروائی بلوچستان ءِ وتواجھی ءَ تاں برجاہ دار اِیت-

ھمے وڑ بلوچ ریپبلکن آرمی ءِ جارکش سرباز بلوچ ءَ شنگ کتگیں درشان ءِ تہ ءَ گوشتگ کہ شیک کالونی سکاری چوکی نزیک ءَ یک لائن، پلیڈ ءِ شش نمبر گیٹ ءِ نزیک یک لائن، 82 گیس ویل پائپ لائن، کوھنیں سیول ھسپتال ءِ نزیک ءَ پائپ لائن، عادل خان کالونی دو پائپ لائنز، بگٹی ھاؤس ءُ جوانسال اسکول ءِ میان ءَ یک پائپ لائن، 53 ویل ءِ گیس پائپ لائن وھدے کہ یک پائپ لائن جکھرانی کھڈ ءِ نزیک ءَ تباہ کتگ-

جارکش ءَ گوشتگ کہ اے کاروائیاں ریاستی چریک سرپراز بگٹی ءِ سوئی آیگ ءِ وھد ءَ کتگ اَنت، زانگ بہ بیت کہ اے وڑیں ریاستی چاریگ ءُ چریک اے سرڈگار ءِ سر ءَ ھچ وڑ اوپار کنگ نہ بنت-