بلوچستان ءِ تیابدپی شھر گوادر ءِ ھند کلدان ءَ سَے لٹ ءُ کٹ کتگیں لاش دزکپتگ انت-
لاشانی پجار احسان ء حسن، نادل بلوچ ء محمد نعیم ءُ حسن ء رفیق ءِ ناماں زانگ بیتگ انت-
دزکپتگیں لاشانی تہ ءَ احسان بلوچ جھمنند جیونی، ھمے سال ءِ 22 جنوری ءَ برات بالاچ حسن ءِ ھوارہ ءَ پاکستانی لشکر ءَ دزگیر کتگ ءُ برتگ ءُ برات بالاچ یل داتگ بیتگ ءُ احسان ءِ لاش دزکپتگ –
ھمے وڑ نادل بلوچ پانوان ءِ جھمنند انت ھمے سال ءِ 19 اپریل ءَ آوار جنگ بیتگ-
حسن رفیق 24 اگست 2026 ءَ جیل ءَ زمانت ءَ یل بوگ ءَ پد جیل ءِ گیٹ ءِ دپ ءَ دوبر پاکستانی چیریں ادارھاں آوار جتگ ءُ مروچی آئی ءِ لاش دزکپتگ-
لھتے وھدانی میان ءَ بلوچستان ءِ جتا جتائیں جاھاں بازیں مردمانی لاش دزکپتگ انت کہ آیانی تہ ءَ گیشتریں مردم زورانسری آوار جنگ بیتگیں مردم بیتگ انت-
اے وئیلانی سر ءَ دمگی ءُ میان استمانی انسانی ھکانی گلاں پدردی درشان کنان ءَ گوشتگ چہ پاکستانی سرکار ءَ لوٹ کتگ کہ آ زورانسری آوار جنگ بیتگیں مردماں آمیدگساں پیش بہ کنت ءُ آیانی کیس گوشدارگ بہ بنت-