بلوچستان ءِ دمگ نوشکی ءِ پولیس ءِ گشگ انت کہ ھشت سالی ئیں جنک ءِ گون ءَ جنسی زوراکی ءَ پد کُشگ بوتگ کہ ایشی ءِ سبب ءَ سَے جرمکار دزگیر کنگ بوتگ انت۔
پولیس ءِ رد ءَ اے ‘وئیل نوشکی ءِ دمگ احمد وال ءَ بوتگ۔ سانمندیں مردمانہ سیادی گوں چاگی ءِ دمگ دالبندین ءَ گشگ بیتگ۔‘‘
نزیکیں مردمانی گشگ ءِ رد ءَ ‘جنک وتی پیرک ءِ لوگ ءَ بوتگیں مرگ ءِ سبب ءَ وتی مات ءِ ھمراھی ءَ نوشکی ءِ دمگ احمد وال ءَ وتی پیرک ءِ لوگ ءَ شتگ بیتگ۔’
‘زھگاں جنکو درچکانی توک ءَ دیستگ’
جنک ءِ سیاد نادر علی ءَ گشتگ کہ یک شمبے ءِ سھب ءَ جنک بیگواہ بوتگ۔ آئی ءِ گْوشگ ءِ رد ءَ ’ما پرس ءِ پتر ءَ نشتگ انت پمیشکا جنک ءِ بیگواھی دیر ءَ پدر بوتگ۔ ایشی ءَ پد ما بازیں کلاکاں پٹ ءُ پول کتگ بلے ھچ نشان نہ رس اتگ۔
آئی ءَ گْوشتگ کہ پد ءَ ھمساھگیں چُکاں ھال داتگ کہ آیاں درچکانی تہ ءَ جنکے دیستگ۔ نادر علی ءِ گشگ ءِ رد ءَ ما پیسر ءَ ھم اے جاہ چار اتگ بلے آ وھد ءَ لاش اود ءَ نہ بوتگ، وھدے ما پد ءَ چکانی ھالانی سر ءَ شُتگ انت گڑا ما لاش ڈنگر ءُ ریکانی تہ ءَ دیستگ ب ءُ دیم ءُ بدن ءِ سر ءَ لٹ ءُ کٹانی نشانی گندگ بوتگ اَنت۔”
آئی ءَ گْوشتگ کہ ”کھول ءَ لاش نوشکی ءَ آورتگ کہ اود ءَ پولیس ءَ کیس درج کتگ ءُ لاش شال ءَ پہ پوسٹ مارٹم ءَ برتگ۔“
ایس پی نوشکی سلیم شاھوانی ءَ رسانکدر ءَ گوں تران کنان ءَ گْوشتگ کہ ”لاش ءِ پٹ ءُ پول کنوکیں ڈاکٹر ءَ اے گپ ءِ پدرائی کتگ کہ جنک ءَ را جنسی زوراکی ءَ پد لٹ ءُ کٹ کنگ ءُ کشگ بوتگ۔“
آئی ءَ گْوشتگ: ”پولیس ءَ ھما وھد ءَ کہ اے وئیل ءِ ھال رس اِتگ پٹ ءُ پول بندات کُتگ، ھمساھگ ءِ چُکاں گْوشتگ اَت کہ گڈی رند ءَ ورنائیں جنک گوں بچکے ءِ ھواری ءَ دیستگ۔
“وھدے کہ پولیس ءَ بچک دزگیر کت گڑا آئی ءَ من اتگ ءُ گشتگ کہ من گوں دو دگہ ھمکاراں جنک ءِ سر ءَ زوراکی کتگ ءُ پد ءَ آ لٹ ءُ کٹ کتگ ءُ کُشتگ۔”
جنک ءِ ناکو ءَ سول ہسپتال شال ءَ رسانکدر ءَ گوں گپ ءُ تران کنان ءَ گشتگ کہ جنک ءَ گوں چو رستری ءَ کنگ ما انساپ لوٹ ایں، سرکار دزگیریں جرمکاراں کانود ءِ چیر ءَ سزا بہ دنت۔
بلوچستان ءِ تھی کارانی وزیر میر ضیا اللہ لانگو ءَ اے وئیل ءِ نوٹس زورگ ءَ پد ایس پی نوشکی ءُ ڈی آئی جی رخشان ڈویژن ءَ چہ رپورٹ لوٹ کتگ۔