زیارت ءَ پوج ءِ پوسٹ ءُ شوربندیانی سر ءَ اُرش، افیسرے ءَ ھوار پنچ کارندہ بیران

بلوچستان ءِ دمگ زیارت ءَ ایپ سی ءِ بُنجل ءُ پولیس کسٹمز ءِ یکجاھی کارگس ءِ سر ءَ اُرش ءِ آسر ءَ کم چہ کم پنچ کارمند بیران ءُ ھپت ٹپی بیتگ اَنت، وھدے کہ ناسرجمیں ھالانی رِد ءَ بیرانیانی کچ ھشت ءَ سر بیگ ءِ گمان اِنت-

اِھوالکار ءِ رِد ءَ اُرش ءَ بیران بیتگیں پاکستانی فوج ءِ کیپٹن ضیاءاللہ، حوالدار سمیع اللہ، لانس نائیک نوروز، لانس نائیک شکیل ءُ سپاھی سجاول ھوار اَنت-

ٹپی بیتگیں کارندھانی تہ ءَ ھوالدار جھانگیر، لانس نائیک سردار، لانس نائیک شبیر، سپاھی انور ءُ سپاھی حکمت ھوار اَنت، آیانی تہ ءَ سپاھی عاشق ءُ سپاھی غلام رسول ءِ جاور ناگیگ گوشگ بیگ ءَ اَنت-

واکدار ءِ نیمگ ءَ ھالانی رِد ءَ اُرش ءِ میان ءَ کسٹمز ءِ چار کارندہ ھم بیران بیتگ اَنت- بلے یکجاھی بیرانی ءُ ٹپیانی کچانی درگت ءَ جتاجتائیں ھال دیم ءَ آیگ ءَ اَِنت کہ آیانی پدری پش کپتگ-

تھریک طالبان پاکستان (ٹی ٹی پی) ءَ اُرش ءِ زمہ واری ءِ ٹاہ داتگ – شنگ کتگیں یک درشانے ءِ تہ ءَ گْوشتگ کہ آیانی اسپیشل استشھاری فورس (ایس آئی ایف) ءَ زیارت ءَ برجاہ جوائنٹ پولیس ءُ کسٹمز کارگس نشانگ کتگ-

ٹی ٹی پی ءَ ٹاہ داتگ کہ میڑ ءِ میان ءَ پانزدہ کارندہ مرتگ یا ٹپی بیتگ اَنت- آئی ءَ دیمتر ءَ ٹاہ داتگ کہ آیانی جنگولاں کاروائی ءِ میان ءَ پانزدہ سلاہ ءُ جتاجتائیں سامان دستیگ کتگ اَنت ءُ یک کواڈ کاپٹر ھم جتگ دور داتگ-