یک شمبے ءِ روچ ءَ جرمن بنجاھی شھر برلن ءَ یاگی آرٹ کلیکٹیو ءِ چیردستی ءَ دود ءُ ربیدگی ءُ سیاسی مراگشے برجم دارگ بوتگ کہ ایشی ءِ تہ ءَ بلوچی تامر، بلوچی دوچاپی ءُ گڈی ءَ یک سیاسی گپ ءُ ترانے پیشدارگ بوتگ۔
بلوچی تھیٹر ءِ وھد ءَ بلوچی زالبولانی سیاسی جُھد ءِ سر ءَ یک ڈرامہ یے پیش دارگ بوتگ کہ ایشی ءِ تہ ءَ بانک کریمہ ، ڈاکٹر ماہ رنگ ءُ سمی بلوچ ءِ کارست ءُ آیانی جُھد دیم ءَ آرگ بوتگ انت۔
پد ءَ بلوچی دوچاپی ءِ بندوبست کنگ بوتگ، ھمے وھد ءَ بانک کریمہ ءِ جھد ءِ بابت ءَ سیاسی گپ ءُ تران ھم کنگ بوتگ کہ ایشی ءِ تہ ءَ بھر زوروکاں جتا جتائیں سرھالانی سر ءَ گپ ءُ تران کتگ ءُ مھمانانی جُست ءُ پُرسانی پسو داتگ اَنت۔
اے مراگش ءِ تہ ءَ برلن ءِ نندوکیں بلوچ ڈائسپورا ءَ ابید جرمنی ءُ دگہ راجانی سیاسی ءُ چاگردی جھدکاراں ھم بھر زرتگ۔