بلوچستان ءِ دمگ چاگی ءَ سلاہ بندیں اُرش ءَ پاکستانی فوج ءِ یک افسرے بیران بوتگ۔ واکداراں اے ھال راست کتگ۔
گوستگیں روچ ءَ چاگی ءِ دمگ چھتر ءَ پاکستانی لشکر ءُ بلوچ آجوئی لوٹوکیں مردمانی میان ءَ بازیں کلاکاں جنگ ءُ چوپانی آسر ءَ دوئیں نیمگاں جانی تاوانانی ھال بوتگ انت۔
واکدارانی رد ءَ اے جنگ ءُ چوپاں پاکستانی فوج ءِ کپتان رینک ءِ افسر ءِ بیرانی ءُ چار ٹپی بوھگ ءِ ھال راست بیتگ۔ واکدارانی رد ءَ بیران بوتگیں افسر ءِ پجار کیپٹن عبید جھمنند سوابی ءِ نام ءَ بیتگ کہ آ 60 ونگ دالبندین رائل فورسز ءَ پوسٹ کنگ بوتگ وھدے کہ آ 147 لانگ کورس ءَ چہ پاس آؤٹ بوتگ۔
اے جنگ ءُ چوپ ھما وھد ءَ بوتگ کہ بلوچ آجوئی لوٹوکیں مردماں اُرشے ءِ تہ ءَ ریکو ڈک پروجیکٹ ءِ کاروان نشانگ جوڑ کتگ ۔ زانگ بہ بیت کہ بلوچ لبریشن آرمی ءَ شال ءُ تپتان ءِ تجارتی راہ ءِ سر ءَ ’ زرکاری بندش‘ ءِ چیر دستی ءَ وتی کنٹرول ءَ برجاہ داشتگ، بلے اے اُرش داں انگت ءَ ھچ گل ءَ نہ زرتگ-