بلوچ ناشرکار نہ انت، آجوئی ءِ جنگ ءَ کنگ ءَ انت- زالبول ھپتاد ءِ دھک ءَ جنگ ءِ بھر بیتگ انت- ڈاکٹر عائشہ فیض

شال ءَ کماشیں راجدوست ھدامرزی ئیں ملک فیض محمد دھوار ءِ جنک ءُ مستونگ ءِ جھمنندیں سیاسی ءُ چاگردی باسک ڈاکٹر عائشہ فیض ءَ گوشتگ بلوچستان ءَ سلاہ بندیں جنگول ناشرکار نہ انت بلوچستان ءِ جنگ ءِ آجوئی ءِ سپاھی ءُ گوریلا جنگول انت- وتی راجی آجوئی ءِ جنگ ءَ کنگ ءَ انت-

اے گپ آئی ءَ دوشمبے ءِ روچ ءَ شال پریس کلب ءَ پریس کانفرنس کنان ءَ گوشتگ انت- ڈاکٹر عائشہ فیض ءَ گوشتگ بلوچستان ءِ انیگیں گھگیری ءُ بلوچ زالبولانی کردار ءِ بارو ءَ درور دیان ءَ گوشتگ ھپتاد ءِ دھک ءَ کوھاں جاڑیگیں سرمچاراں بلوچ زالبولاں وتی لوگاں مھمانی کتگ انت-

آئی ءَ گوشتگ وھدیکہ سرمچار بازیں روچاں کوھاں بیتگ انت گڑا زالبولاں وتی لوگاں آیانی مھمانی کتگ انت – پرچا کوھاں آیانی ورگ ءُ چرگ ءِ آسراتی شوک نہ بیتگ- آیانی رد ءَ کجام ھم سرمچار ءِ جان وش وش نہ بیتگ گڑا ڈاکٹر لوگ ءَ اتکگ ءُ لوگاں آیانی الاج اش کتگ انت-

ڈاکٹر عائشہ فیض ءَ گوشتگ اے گیرت مندین بلوچانی کسہ انت – آئی ءَ گوشتگ بلوچاں زورگر کتگیں ریاست کلات واتر لوٹ ایت- پرچاکہ آئی ءِ رد ءَ کلات زورگری کنگ ءِ وھد ءَ بلوچانی واھگ ھوار نہ بیتگ-

آئی ءَ گوشتگ ھنچش کلات زورانسری گرگ بیتگ ابید ءِ مئے واھگ ءَ مارا واتر لوٹ ایت مارا ھمک جاور ءَ لوٹ ایت اے مئے سرڈگار انت-

آئی ءَ گوشتگ بلوچ راج ءُ بلوچ زالبول گیرت مند انت – بلکیں بلوچ زالبولاں ھپتاد ءِ دھک ءَ آجوئی ءِ جنگ ءَ بھر زیرگ بندات کتگ- آئی ءَ گوشتگ گھگیرانی ھدمت کنگ ھم بلوچ زالطولانی جزبگ ، گیرت ءُ بلوچستان ءِ آجوئی جنگ ءِ بھر ءِ درشان بیتگ-

ڈاکٹر عائشہ فیض ءَ گوشتگ منی آرپیں کماش ءَ گڈی روچاں گوشتگ چرت مہ جن ات زمین ءِ چیر ءَ ھما پوج جوڑ بیگ انت آ بلوچستان ءَ آجو کنت انت-

آئی ءَ گوشتگ مرگ ءِ بستراں جاڑیگ بوگ ءَ ابید کلات ءُ آجوئیں ڈیھ ءِ چُرت ءَ بیتگ- آئی ءِ رد ءَ کلات ءِ مھلوک لڈینگ بیتگ ءُ دستیگ کنگ بیتگ ءُ ٹگی ءُ ھنر ءَ زورانسری گرگ بیتگ- چریشی ءَ آ واتر زورگ ءِ جد ءُ جھد ءِ گپ ءَ کنت انت-

ڈاکٹر عائشہ فیض ءَ گوشتگ بشیر زیب ءُ ڈاکٹر اللہ نزر آجوئی ءِ جنگ ءَ کنگ ءَ انت اے بلوچستان ءِ جنگول، بلوچستان ءِ آجوئی ءِ سپاھی، نہ ترسیں جنگول ءُ ریپبلک آف بلوچستان ءِ لشکر، آرمی ءُ گوریلا جنگول انت-مئے بھادر انت آ وتی جنگ ءَ کنگ ءَ انت-

آئی ءَ گوشتگ جنگولاں ناشرکار گوشگ درست نہ انت جنگاں ھردوکیں نیمگاں یکے دومی ءِ ھلاپ انت دو راج جنگ کنت- اگاں یک نیمگے ءَ ناشرکار گوشگ گڑا دومی نیمگ ءِ ھم ناشرکار گوشگ بہ بیت-

آئی ءَ گوشتگ جنگولیں گل وتی تامر ءُ توار بنداں بازیں براں مھلوک ءَ آ دمگاں کڈن کنگ ءَ انت کہ اود ءَ آیانی جنگ انت – آئی ءِ رد ءَ تاجر، واپاری مھلوک، لس مھلوک ء چہ پنجاپ ءَ سیادی داروکیں مزدوراں گوشگ بیتگ اے دمگاں میا ات کہ جنگ برجاہ انت-

ڈاکٹر عائشہ فیض ءَ سرکار ءِ نیمگ ءَ اُستانی وزیر داکلہ ءِ کاروان ءِ سر ءَ اُرش ءِ جواز کنگ ءَ باگانی سوچگ ءُ مھلوک ءِ لڈ ءُ بار ایر جتگ-

آئی ءَ گوشتگ اے وڑیں جنجالاں مھلوک ءِ جیڑہ گیش بنت ءُ ریاست ءِ ھلاپ ءَ نپرت گیش بنت-

آئی ءَ گوشتگ اگاں کھڈ کوچہ ءِ مھلوک لڈینگ بیت ءُ آیانی باگ سوچگ بیت انت گڑا دمگ ءِ مردین ءُ جنین گھگیری ءَ لاچار بنت ایشی ءِ درستیں زمہ واری سرکار ءِ سر ءَ لڈگ بیت انت-

آئی ءَ گوشتگ مھلوک وتی ھلک ءُ دمگاں ھچبر یل نہ کنت وتی باگانی سوچگ ءِ اجازت ءَ نہ دنت-

ڈاکٹر عائشہ فیض ءَ گوشتگ بلوچستان ءِ برانز مروچیگین نہ انت بلکیں بازیں سالاں گوں بندوک انت ءُ آئی ءِ کھول ءَ ریاست کلات ءِ زوگری ءِ بگیرداری کتگ ءُ جد ءُ جھد کتگ-

زانگ بہ بیت ملک فیض محمد یوسفزئی (دھوار) بلوچستان ءِ بنداتی سیاسی ءُ راجی زرمبشتانی گچینی رھشوناں ھوار بیتگ- آ میر عبدالعزیز کرد، میر یوسف عزیزمگسی ءُ دگہ بلوچ رھشونانی ھمراھی ءَ انجمن اتھاد بلوچان ءِ سیاسی جد ءُ جھد ءَ ھوار بوتگ- چریشی ءَ بلوچستان ءِ سیاسی کَچو، بلوچ ھلکاں ھمسنتی ءُ سیاسی ھکانی واستا جد ءُ جھد کتگ- پد ءَ کلات اسٹیٹ نیشنل پارٹی ءِ سیاسی پرکاریاں ھوار بوتگ ءُ بلوچ سیاسی زانشت ءِ مھکم کنگ ءَ جوانیں کردے پیلوے کتگ-