چہ اوستہ محمد ءَ دزکپتگیں لاشانی پجّار چہ بیگواھیں مردماں بیتگ اَنت

گوستگیں روچ ءَ چہ اوستہ محمد ءَ دزکپتگیں سئیں لاشانی پجّار بیتگ اَنت-

بلوچستان ءِ دمگ اوستہ محمد ءَ بیست ءُ چار اگست ءَ دزکپتگیں لاشانی تہ ءَ سئے لاشانی پجّار بلوچستان ءِ جتاجتائیں دمگاں چہ پاکستانی پوج ءِ دست ءَ زورانسری آوار جنی ءِ نشانگ بیتگیں مردماں چہ بیتگ اَنت-

کُشگ بیتگینانی تہ ءَ بلوچستان ءِ دمگ چہ بولان مچھ ءَ مئی 2026 ءَ زورانسری آوار جنی ءِ نشانگ بیتگیں لیویز کارندہ حافظ محمد وقاص، آئی ءِ برات مٹھا خان ء نواب خان، وھدے سبزنڈ ءِ جھمنندیں ورنا مقبول احمد ء جان محمد ھوار اَنت-

سئیں ورنا مدرسے ءِ نودربر اَنت، وھدے کہ اشانی تہ ءَ حافظ قرآن اَنت ھم-

ھالانی رِد ءَ زورانسری آوار جنی ءِ نشانگ بیتگیں ورنایانی لاش24 اگست ءَ چہ اوستہ محمد ءَ دزکپتگ اَنت، آ لَٹ ءُ کُٹ ءَ پد کُشتگ اَنت-

زانگ بہ بیت ھنگیں روچاں بلوچستان ءِ جتاجتائیں دمگاں، پنجگور، مستونگ ءُ ھاران ھوار اَنت پانزدہ ءَ چہ گیش لاش دزکپتگ اَنت، کُشگ ءَ پد لاش دور داتگ اَنت-

چہ پنجگور ءَ دزکپتگیں دھیں لاشاں چہ بازین ئِے پجّار پاکستانی پوج ءِ دست ءَ زورانسری آوار جنی ءِ نشانگ بیتگیں مردماں چہ بوتگ اَنت وھدے کہ بازیں لاشانی پجّار تنی وھدے نہ بیتگ-

بلوچستان ءَ بازیں سالاں چہ زورانسری آوار جنی ءِ نشانگ بیتگیں مردمانی لاشانی دزکپگ ءِ وئیلانی تہ ءَ گیشی گندگ ءَ اَتکگ، بلوچستان ءَ سیاسی پارٹی ءُ میان اُستمانی انسانی ھکانی گلاں بھتام اِنت کہ پاکستانی پوج بلوچ بیگواھیں مردماں بندیگجاہ ءَ کُش اِیت ءُ آیانی لاشاں دور دنت-

سیاسی ءُ انسانی ھکانی گلاں باز رند ءَ ریاستی ادارھاں چہ بیگواھیں مردمانی کُشگ ءِ دْرچ ءَ بند کنگ، زورانسری آوار جنی ءِ نشانگ بیتگیں مردماں دیم ءَ آرگ ءُ آیاں انساپ ءِ دیگ لوٹ کتگ بلے پاکستانی ھکومت ءُ سیکیورٹی ادارہ زورانسری آوار جنی ءَ ھمگرنچ بیگ ءَ منّوگر نہ اَنت، چریشی ءِ سوب ءَ اے درگت ءَ ھچ وڑیں گامگیج زیرگ نہ بیتگ-