ڈی جی آئی ایس پی آر ءِ پریس کانفرنس: ٹاہ، کچ ءُ کساس ءُ زمین ءِ راستی
ٹی بی پی شونگال
سی ءُ یک جولائی ءِ نیمروچ ءَ پاکستانی پوج ءِ جارکش لیفٹیننٹ جنرل احمد شریف چوھدری ءِ پریس کانپرنس ءَ بلوچستان ءِ انیگیں جاورھال، بیگواھیں مھلوک ءُ دگہ جیڑھانی سر ءَ سرجمیں درشان داتگ -پوج ءِ جارکش ءَ بلوچستان ءِ درگت ءَ اے درشان رد کتگ کہ بلوچستان یکشل ءَ ناگیگیں جاورھالانی رنگ ءَ بد امنی ءِ لپیٹ ءَ انت- آئی ءِ گوشگ انت کہ بازیں تک ءُ پھناتاں پہ زانت بلوچستان ءِ جاورھالاں ناگیگی پدر کنگ ءَ انت- پریس کانفرنس ءَ پیش کنگ بیتگیں کچ ءُ کساسانی رد ءَ سرجمیں ڈیھ ءَ 40,348انٹیلی جنس بیسڈ آپریشن کنگ بیتگ انت، چریشانی تہ ءَ درستاں گیش سِی ءُ یک ھزار آپریشن بلوچستان ءَ کنگ ءِ ٹاہ داتگ- بلے اے کچ ءُ کساسانی تَک ءَ جتا جتائیں جست ایر کن انت کہ اگاں بلوچستان ءِ جاور اے داب ءَ ساب ءُ سلو انت ھنچشکہ سرکاری درشانداب پیش کنت ، گڑا بلوچستان ءَ اے داب ءَ مزنیں ءُ یکشلیں پوجی آپریشنزانی درکاری پرچا پیش آیگ ءَ انت؟ ھاں اے کچ ءَ آپریشن وت اے گپ ءِ مانزمان نہ انت کہ بلوچستان یک ناگیگیں جاورھالے ءَ گوزگ ءَ انت؟ ھمیش انت اے جاہ اود ےَ سرکاری لیکہ ءُ زمین ءِ راستی پریچگ ءَ یک جتائیں رنگے ءَ گندگ بنت- اگاں گوستگیں بازیں سالاں بازیں کچے ءَ آپریشن برجاہ انت گڑا بلوچستان ءَ ھمک جاورھال ھم ناگیگی ءِ آماچ انت گڑا بلوچستان ءِ جیڑہ ایوک ءَ سلاہ بندیں کاروائیاں گوں بندوک نہ انت اود ءَ ریاستی رِٹ، سیاسی نمائندگی، انسانی ھک ءُ مھلوک ءِ ستک ءِ وڑیں دروشم بنکی سنچ دار انت-
اگاں بلوچستان ءِ جاورھالاں ھرت چاری ءُ یک نیمگے ءَ چارگ ءُ زانگ بہ بیت گڑا زمین ءِ راستی ءُ سرکاری درشان جتاجتا گندگ بنت- بلوچستان ءَ ھمک روچ پورسز ءِ سر ءَ اُرشانی اھوال دیم ءَ آیگ ءَ انت ھمے وڑ ےَ بلوچستان ءِ گچینی شھدگ سرجم ءَ بے مھکم انت، سیکیورٹی ترس ءَ ٹرانسپورٹراں وتی گاڑی اوشتارینتگ زھرشانی کنگ ءَ انت ءُ پھریزی راھانی لوٹ ءَ کنگ ءَ انت-اگاں گوستگیں بازیں سالانی وھداں کنگ بیتگیں انٹیلی جنس بنیاد ءَ پوجی آپریشنانی کچ ءُ کساسانی چار ءُ ٹپاسی ءَ زانگ بیت انت ریاست ءَ بلوچستان ءَ یکشل ءَ جیڑھانی دیمپانی انت – ھمے اڑوکی چَپ ءَ جاورھال شر گوشگ ببت بلے زمینی راستیاں گوں ھمدپ نہ بنت-
آئی ایس پی آر ءَ بلوچستان ءِ ناگیگیں جاورھالانی درستیں زمہ وار میان اُستمانی پندل گوشتگ – بلے بلوچستان ءِ نہ وشیں جاورھالاں تھنا درملکی دراندازی یا درملکی پندل گوشگ ءِ آسری زمینی راستیانی ھمدپ نہ بیت انت- بلوچستان ءِ جیڑہ ءِ روتگ بازیں دھکاں سیاسی، چاگردی زبھری، بیگواھیں مردمانی جیڑہ، جتا جتائیں وھداں ترندیں سیکیورٹی پالیسیانی درچ ھوار انت- ھمے واستا بلوچستان ءِ جیڑہ ءِ راستیں پریچگ ءَ سرجم نہ کنت کہ آئی ءَ بس ڈنی دراندازی ءِ انساپ ءِ لوٹاں سرجمی ءَ ایر کپت نہ کنت بلکیں آئی ءِ اندری جاورانی ساپ ءُ سلوئی ءَ ٹپاسی زیرگ بہ بیت کہ سالانی سال مھلوک ءِ شکایت ءِ پیڑو بیتگ انت- ایوک ءَ سیکیورٹی گامگیج یا دراھیں زمہ وار ڈنی مھلوک ءِ سر ءَ لڈگ ءَ جیڑہ ءِ جتا جتائیں پھناتاں سرجمی ءَ سرپد بوگ ممکن نہ بیت انت-
بلوچستان ءَ ھما جیڑہ کہ درساں گیش نگیگ انت آ زورانسری آوارجنی ءِ جیڑہ انت ۔ گوستگیں دو دھکاں اے جیڑہ ملکی سیاست ، مردمی ھکانی باوست ءُ میان اُستمانی ادارھانی دلگوش بنجاہ انت ۔ ریاستی ادارھانی گوشگ انت کہ بازیں مردمے دری ملک یا دگہ دمگاں شتگ انت وھدیکہ گوستگیں دو روچاں ڈی جی آئی ایس پی آر ءَ گوست ءِ وڑ ءَ دوبر وتی درشان داتگ کہ زورانسری آوار جنگ بوتگیں مردم سلاہ بندیں گلاں ھوار بوتگ انت ۔ بلوچستان ءَ زورانسری آوارجنی ءِ جیڑہ ءِ درگت ءَ وھد وھد ءِ سر ءَ میان اُستمانی مردمانی ھکانی گل اشی ءِ سر ءَ پدردی درشان کنگ ءَ انت ۔ اکوام متھدہ ءِ نیمگ ءَ زورانسری آوارجنی ءِ درگت ءَ ورکنگ گروپ پاکستان ءَ بازیں کیسانی سر ءَ گپ جتگ ۔ اے ادارہ ءَ چہ پاکستان ءَ لوٹ کتگ کہ زورانسری آوارجنگ بوتگیں مردمانی کیس شریں وڑے ءَ ٹپاس کنگ بہ بنت ءُ سانمندیں مردم سرپدی دیگ بہ بنت ۔ ھمے وڑ میان جھانی گل چوش کہ ایمنسٹی انٹرنیشنل ءُ ہیومن رائٹس واچ ءَ وتی رپورٹانی تہ ءَ بلوچستان ءَ زورانسری آوارجنی ءِ درگت ءَ گپ جتگ ۔ زورانسری آوارجنگ بوتگیں مردمانی جیڑہ سک ءَ ھراب ءُ مردمی ھکانی جیڑہ ھزاراں کھولانی درد ، ودار ءُ ازیت ءَ گوں دچار انت ءُ انسانی ھلاسی یے ۔ ءُ اے دابیں درشان ھما سانمندیں کھولانی ٹپانی سر ءَ واد پر ریچگ انت ۔ اگاں ریاست راستی ءَ وتی گپاں منارینگ لوٹ ایت گڑا ھشکیں بٹاک مہ بنت بلکیں راست ءُ تچکیں ءُ یک نیمگی پٹ ءُ پول ءَ بندوک انت ۔
آئی ایس پی آر ءِ پریس کانپرنس ءِ تہ ءَ بلوچستان ءِ سردار ءُ ٹکی سروکانی کرد ھم لپاشتگ ۔ ریاست ھر مدام ھمے گوشگ انت کہ بلوچستان ءِ جیڑہ تاکت وریں تبکہ ءُ دری ملکاں ھراب کتگ انت بلے پد ءَ ھم آئی ءِ اے گپانی سر ءَ بازیں تک ءُ پھناتاں بگیری دارگ بوگ ءَ انت ۔ بلوچستان ءَ ھستیں وھد ءَ بازیں سردار ءُ ٹکی سروک ریاستی ادارھانی نزیک زانگ بوتگ انت ۔ راجدوستانی گوشگ انت کہ گوست ءَ ھم ریاستی پالیسیانی رد ءَ اے وڑیں ٹکی سروک ءُ سیاسی ارزشت دیگ بوتگ انت ۔ وھدیکہ سیاسی توار کہ گیشتر وتواکی مڈیانی سر ءَ واک ءِ گپ جنگ بوتگ آ چیرترینگ بوتگ انت ۔ راجدوستیں پاٹی ءُ بازیں سیاسی باسکاں بھتام جتگ کہ گوست ءَ سیاسی انجینئیرنگ ءِ رد ءَ اے وڑیں مردم ازرزشت دیگ بوتگ انت پرچاکہ آ ریاستی پالیسیاں گوں نزیک بوتگ انت وھدیکہ بگیرداروک چیرترینگ بوتگ انت ۔
بلوچستان ءَ ھمک روچ جاور ھال نگیگ تر بوان انت ۔ ایمنی ، سیاسی ، مالی زبھری ، زورانسری آوارجنی ، مھلوک ءِ تہ ءَ بے چینی ریاست ءِ سر ءَ اوست دارگ بوگ ءَ نہ انت وھدیکہ ریاست ءِ ترندیں پوجی کارانی پالیسی ءَ بلوچستان ءِ تہ ءَ زبھری ءِ مارشت ءُ ریاست ءَ دوری گیش بوتگ ۔ اگاں ھمے پالیسی برجاہ بوت انت زمینی راستی ءَ چپیں درشان دیگ بوت گڑا بلوچستان ءِ جاور چد ءُ گیشتر ھراب بوت کن انت کہ اشی ءِ نپ بلوچ سلاہ بندیں گلاں رس انت دومی نیمگ ءَ بلوچستان ءِ راستیگیں سیاسی ، چاگردی ءُ راجی جیڑہ ءَ نادلگوش کنگ ءُ درسیں زمیاں دری ءُ درملکی پندل گوشگ ایوک ءَ راستی ءَ چہ تچگ ناں بلکیں ھنچیں پالیسی ءِ کہ چریشی ءَ بلوچستان ءِ جاور ھمے وڑ برجاہ انت ۔ تاں ھما وھد ءَ ریاست وتی ردیاں نہ من ایت ، مھلوک ءِ لوٹ سیاسی ھک ,ءُ انساپ ءَ نہ من ایت گڑا بلوچستان ءَ ایمنی ءِ واب ءَ کس دیست نہ کنت-