بلوچستان : جتاجتائیں دمگاں چہ پنچ لاش دزکپتگ اَنت

بلوچستان ءِ دمگ جتاجتائیں دمگاں چہ دگہ پنچ لاش دزکپتگ اَنت-

بلوچستان ءِ دمگ چہ پنجگور ءَ ھالانی رِد ءَ گوستگیں روچ ءَ پاکستانی پوج ءِ دست ءَ زورانسری آوار جنی ءِ نشانگ کنگ بیتگیں سلمان بنگلزئی ء گنی بنگلزئی ءِ لاش دزکپتگ-

دومی نیمگ ءَ بلوچستان ءِ دمگ سوراب لاکھوریان ءِ کوھی دمگ ءَ چہ یک مردمے ءِِ لاش دزکپتگ، کہ لاش دستیگ کتگ ءُ نادُراھجاہ ءَ برتگ- اود ءَ آئی ءِ پجّار بیست ءُ ھشت سالی ئیں جلیل احمد ء بشیر احمد ،جھمنند سموانی زھری، ءِ نام ءَ چہ بیتگ-

ھمے وڑ گوستگیں بیست ءُ چار کلاکانی میان ءَ بلوچستان ءِ دمگ کیچ ءِ جتاجتائیں ھنداں چہ سے مردم ءِ لاش دزکپتگ اَنت-

کیچ ءِ دمگ دشت ءَ میرانی ڈیم کینال ءَ یک مردمے ءِ لاش دزکپتگ کہ آئی ءِ پجّار سلمان ء لیاکت جھمنند کھڈاں نام ءَ چہ شر بیتگ-

لاش ءَ کانودی کاروائی ءِ ھاتر ءَ نادُراھجاہ ءَ برتگ-

ھمے وڑ تربت پولیس ءِ رِد ءَ ناصر آباد ءِ دمگ ءَ یک مردمے ءِ لاش دزکپتگ، آئی ءِ کسگ ءَ کووڈ- 19 کارڈ ءَ چہ آئی ءِ پجّار بدل خان نام ءَ چہ بیتگ اَنت، وھدے کہ کارڈ ءِ سر ءَ نکش پجّار کارڈ نمبر آواران ءِ دمگ جھاؤ اِنت-

ھمے وڑ گوستگیں شپ ءَ تربت ءِ دمگ میرآباد ءَ چہ جنگل ءَ یک مردمے ءِ پجّار شیر جان ء نور محمد ءِ لاش دزکپتگ، پہ چار ءُ ٹپاس ھاتر ءَ نادُراھجاہ ءَ برتگ-

دمگی اِھوالکار ءِ لاش ءِ سر ءَ لَٹ ءُ کُٹانی نشانگ کنگ بوتگ اَنت، ھمے گمان کنگ بیتگ کہ لَٹ ءُ کُٹ ءَ چہ پد کشتگ دور داتگ-