بلوچ آجوئی لوٹوکیں سلاہ بندیں گل بی ایل اے ءِ سروک بشیر زیب بلوچ ءِگلی ءُ پوجی کارانی نوکتریں کتابک ”مڈی “ شنگ بوتگ ۔
جون 2026 ءَ بی ایل اے ءِ شنگ کاری ادارہ ھکل ءِ نیمگ ءَ شنگ بوتگیں اے کتابک ءَ گل ءِ دیمتری جنگانی وڈ ءُ پیم ، سلاہ ، مواد ءِ سائنسی مینیجمنٹ ءُ ترندیں گلی راہ ءُ رھبند نویس اتگ انت ۔
کتابک ءِ سے گچینی بھرانی تہ ءَ مڈی ءِ معیشیت ، مڈی ءِ ضابطہ اخلاق ، ءُ نپسیات ھوار انت کہ اشی ءِ تہ ءَ روایتی سلاہ بندیں جنگ نوکتریں چیرجنگی ءِ تہ ءَ مٹ کنگ ءِ سرا زور داتگ ۔
کتابک ءِ رد ءَ بی ایل اے ءِ پوجی ، سیاسی ءُ لاجسٹک تہ ءَ ھروڈیں سلاہ ، گولا بارود ، تراک ناکیں شوروانی درگت مچانکی نوشتانکاں مڈی ءِ نام داتگ ۔ ندکار ءَ پدر کتگ کہ اے مڈی ایوک ءَ مادی اوزار نہ انت بلکنہ راجی امانت انت ۔
کتابک ءِ تہ ءَ جھانی پوجی گوستانک ، ماوزے تنگ ءِ ” دراجکشیں جنگ ” ویتنامی جنرل نگوین گیاپ راد منیجمنٹ ءُ آئرش ریپبلکن آرمی کوارٹر ماسٹر جنرل کاریس وڈیں نامداریں مردمانی درور داتگ ءُ گوشتگ کہ درجکشیں جنگ ءَ مادن ءِ کمی ءِ رکگ ءِ ھاتر ءَ سائنسی انتظام المی انت ۔
کتابک ءِ دومی بھر مڈی ءِ درگت ءَ ترندیں کانودانی جار جتگ ۔ پہ دیم تیر جنگ ایرجتگ ءُ سبر اوپار ءَ تیر جنگ چیرجنگی ءِ تاکت ءِ گوشتگ ۔
کتابک ءِ گڈی بھر ءَ مڈیانی نپسیاتی تکاں شریں وڈی ءَ باوست کتگ ۔
بشیر زیب ءِ گوشگ انت کہ چیرجنگی ایوک ءَ میدان ءَ جنگ کنگ نہ انت بلکنہ مجگی جنگ کنگ کپ ایت ۔ آئی ءِ رد ءَ وھدیکہ چیرجنگیں سرمچار ءِ دژمن ءِ تپنگ ءَ پچ گپت ءُ آئی ءِ بگیری ءَ کارمرز کنت گڈا اے دژمن ءِ سرا مزنیں نپسیاتی سان ءِ دور دنت کہ آئی ءِ پوجی تاکت ءَ نزور کنت.
زانگ بہ بیت بی ایل اے ءِ نیمگ ءَ چدوساری ھم بازیں بنگپانی سرا پی ڈی ایپ ءُ ھارڈ ءَ کتاب شنگ کنگ بوتگ انت ۔ ءُ بشیر زیب بلوچ ءِ ھم چدوساری ھمے سال ءَ موکش ( بزاں رھشون ) ءِ نام ءَ کتاب ءِ شنگ بوتگ ءُ آئی ءَ ساری مھرگوش ءِ نام ءَ ھم یک کتاب ءِ شنگ بوتگ ءُ اشی ءَ ابید آئی ءِ بازیں نوشتانک ءِ رسانک ءُ چاگردی ترامجاھاں شنگ بوتگ انت ۔