بلوچستان ءِ جتاجتائیں دمگاں پاکستانی پوج ءُ گیس پائپ لائن ءِ سر ءَ اُرش کنگ بیتگ

بلوچستان ءِ جتاجتائیں دمگ کوھلو، ھاران، کیچ، نصیر آباد ءُ روجھان ءَ پاکستانی پوج ءُ گیس پائپ لائن ءِ سر ءَ اُرش کنگ بیتگ-

گیشیں ھالانی رِد ءَ کوھلو ءِ دمگ ھسڑی ءَ انسداد ناشرکاری فورس (اے ٹی ایف) ءِ کارندھانی سر ءَ مروچی سُھب ءَ سلاہ بندیں مردماں اُرش کتگ – بنداتی، ھالانی رِد ءَ اُرش ءِ آسر ءَ کارمنداں جانی ءُ مالی تاوان چست کنگ کپتگ، بلے تاوانانی سرجمیں ھال دیم ءَ نیتکگ اَنت-

ھمے وڑ ھاران ءِ دمگ تازینہ ءَ ھم پاکستانی پوج ءُ سلاہ بندانی میان ءَ میڑ ءِ ھال اِنت- اِھوالکار ءِ گوشگ اِنت پاکستانی پوج دمگ ءَ آپریشن ءَ دلگود بیتگ ءُ اے میان ءَ سلاہ بندیں مردماں مارٹر گولھاں چہ اُرش کتگ – ھالانی رِد ءَ اُرش ءَ پوج ءَ جانی تاوان چست کنگ کپتگ-وھدے کہ پوج دمگ ءَ چہ پُشتکنزی کنگ کپتگ-

اِھوالکار ءِ رد ءَ گوستگیں شپ ءَ ھم ھمے دمگ ءَ پاکستانی پوج ءَ پیشگامی ءِ جُھد کتگ، بلے جاورھال ناگیگ بیتگ اَنت-

اھوالکار ءِ رد ءَ زی سھب ءَ کیچ ءِ دمگ دشت ءِ ھند کھڈان ءَ سلاہ بندیں مردماں پاکستانی پوج ءِ بنجل ءِ سر ءَ اُرش کتگ ۔ اُرش داں دیراں برجاہ بوتگ-

ھمے وڑ زی بیگاہ ءَ ھم دشت ءِ ھند بلنگور ءَ مزنیں بنجل ءِ سر ءَ سلاہ بنداں اُرش کتگ۔ دوئیں اُرشانی آسر ءَ پوج ءَ جانی تاوان ءِ گمان اِنت-

کیچ ءِ دمگ دشت ءَ پاکستانی پوج ءُ سلاہ بندانی میان ءَ تُرندیں میڑے بیتگ۔

اھوالکار ءِ رد ءَ کیچ ءِ دمگ دشت ءَ زی مگرب ءَ تاں شپ ءِ ادار دہ ءَ سلاہ بندیں مردم ءُ پاکستانی پوج ءِ میان ءَ تُرندیں میڑے برجاہ بوتگ۔

مزنیں کچے ءَ دمگ تیر ءُ تراکانی توار اِش کنگ بوتگ اَنت تنی وھدے جانی تاوان ءِ ھال دیم ءَ نیتکگ-

دومی نیمگ ءَ نصیر آباد ءَ آر ڈی 418 ءَ رؤکیں گیس پائپ لائن میر حسن کھوسہ ءِ ھند سر ءَ نشانگ کنگ بیتگ وھدے پنجاب ءَ رؤکیں گیس پائپ لائن روجھان ءِ ءِ دمگ ءَ گوستگیں شپ ءَ تراک ءَ چہ تباہ کنگ ءِ ھال اِنت- اِھوالکار ءِ رِد ءَ تراک ءِ سوب ءَ گیس پائپ لائن ءَ سک تاوان رس اِتگ-

تنی وھدے ھچ وئیلانی زمہ واری ھچ گل ءَ نہ زرتگ اَنت-