بلوچستان ءِ بنجاھی شھر شال، گوادر ءَ پنچ مردم زورانسری بیگواہ کنگ بیتگ انت ءُ پانزدہ یل کنگ بیتگ انت-
ھالانی رد ءَ 21 جولائی 2026 ءِ سھب ءَ پاکستانی لشکر ءَ شال ءِ دمگ کلی الماس ، ایرپورٹ روڈ ءَ لوگانی سر ءَ بیڑ برتگ ءُ حافظ عبدالنافع ء محمد ابراھیم بلوچ ءُ بیبرگ بلوچ ء عین الدین بلوچ دزگیر کنگ ءَ پد بیگواہ کتگ انت-
دمگی مردمانی رد ءَ ھر دوئیں آئی ایس آئی ءُ سی ٹی ڈی ءِ کارندھاں برتگ اَنت بلے انگت ءَ آیانی بابت ءَ ھچ وڑیں ھال ءُ اھوال پدر نہ بوتگ۔
دومی نیمگ ءَ ھاران ءِ نندوکیں گل خان ءِ چک میران بلوچ 23 جولائی 2026 ءِ شپ ءَ شال ءِ بشیر چوک ءَ سی ٹی ڈی ءِ کارندھاں دزگیر کتگ ءُ برتگ –
ھمے وڑ ءَ شال ءَ بی ایس او شال ھنکین ءِ سروک یونس بلوچ پاکستانی لشکر ءُ چہ جند ءِ لوگ ءَ آوار جتگ ءُ برتگ-
بی ایس او ءِ رد ءَ گوستگیں دو شپ ءَ پیش آ ابید ءِ وارنٹ ءَ لوگ ءَ آوار جنگ بیتگ –
ھمے وڑ ءَ گوادر پلیری ءَ دشت شولیگ ءِ جھمنندیں پوریاگر عارف ء یاسین چیریں ادارھانی کارندھاں آوار جتگ ءُ برتگ-
دومی نیمگ ءَ جتا جتائیں دمگاں چہ زورانسری بیگواھیں 15 مردمانی یل بوگ ءِ ھال دیم ءَ اتکگ انت۔ یل بوتگیں مردمانی تہ ءَ شال ءِ جھمنند شھزاد قمبرانی، محمد رحیم، عزیز بلوچ، عامر جمیل ءُ شھروز بلوچ ھوار انت۔
چہ پنجگور ءَ حفیظ اقبال ، وھدیکہ پروم ءِ نندوک زاھد بلوچ ، عزیز ءُ فدا ھم یل کنگ بیتگ اَنت ۔
ھمے رنگ ءَ چہ آواران ءَ فضل بلوچ ءُ صدام حسین ، واشک ءِ دمگ ناگ بازار ءَ جھان زیب ءُ بیزن ، کیچ ءَ محمد صادق ، سوراب ءَ خدا بخش ءُ ڈیرہ گازی ءِ دمگ تونسہ شریف ءَ موبین بلوچ ءِ یل بوگ ءِ ھال سر بیتگ انت-