بلوچستان ءِ جتاجتائیں دمگاں چی مستونگ ،سوراب ءُ ھاران ءَ پوجی کاروائی، کواڈ کاپٹر اُرش ءُ زورانسری آوار جنی ءِ ھال دیم ءَ اَتکگ اَنت-
اِھوالکار ءِ رِد ءَ مستونگ ءِ دمگ دشت کمبیلا ءَ پاکستانی پوج ءِ نیمگ ءَ چہ یک لوگے ءِ سر ءَ کواڈ کاپٹر ءَ چہ نشانگ کتگ، چریشی ءِِ آسر ءَ یک زالبولے سک ٹپی بیتگ اَنت-
ھمے وڑ سوراب ءِ دمگ نغاڑ ءَ پوج ءِ نیمگ ءَ چہ مزنیں کچے ءَ سر ءَ سرچ آپریشن کنگ بیتگ- دمگی اِھوالکار ءِ گوشگ اِنت کہ آپریشن ءِ میان ءَ جتاجتائیں دمگاں لوگ لوگ ءَ پٹ ءُ پول کتگ وھدے کہ بازیں تھی ءُ ڈنی راھانی سر ءَ چاروگی تُرند کتگ-
اے میان ءَ سوراب ءَ چہ خلیل احمد ء نور محمد ءَ ھوار دو مردم آوار جتگ ءُ ناشناسیں جاھے ءَ برتگ- کھول ءِ گوشگ اِِنت دوئیں مردمانی دزگیری ءَ پد آئی ءِ درگت ءَ ھچ وڑیں ھال نیست-
دومی نیمگ ءَ ھاران ءِ دمگ تازینہ ءَ مروچی سُھب ءَ پاکستانی پوج ءِ نیمگ ءَ چہ آپریشن کنگ بیتگ- اِھوالکار ءِ رِد ءَ کاروائی ءِ میان مارٹر گولہ آس دیگ بیتگ ءُ کواڈ کاپٹراں چہ کارمرز کنگ بوتگ-
دمگی اِھوالکار ءَ ٹاہ داتگ کہ یک کواڈ کاپٹرے ءِ اُرش ءَ سے پس مرتگ – بلے انسانی جانی تاوان ھال دز نہ کپتگ-
اِھوالکار ءِ رِد ءَ اے دمگ ءَ سلاہ بندیں مردماں یک کاروائی ءِ میان ءَ یک کواڈ کاپٹرے جتگ دور داتگ، بلے اے درگت ءَ ھچ وڑیں سرکاری ءِ نیمگ ءَ راست ءُ رد کنگ نہ بوتگ-